Ayaw siya’g pagdid-i

SEPTIYEMBRE 30,2018: Ikakawhaa’g-unom nga

Domingo sulod sa tuig

MGA PAGBASA: Num. 11; 25-29/Sal. 19/ San. 5;1-6/Mk. 9; 38-43,45-48

Kini ang gipahimangno ni Jesus ngadto sa iyang mga tinun-an sa dihang nihimo sila og pagtaho nga dunay tawo nga nanghingilin og mga yawa sa ngalan ni Jesus apan dili sakop sa ilang pundok. Nakita ni Jesus ang bili sa gitawag natong kahiusahan sa tumong ug tinguha. Dili mahitabo nga ang maong tawo makahimo og dautan ni makasulti og dili maayo batok kaniya. Kay gigamit sa maong tawo ang iyang ngalan nagpasabot lamang kini nga anaa ang pagtuo sanglit dili man nimo mahimong malitok ang bisan unsa kun wa kay kasayuran kalabot niini ug mahimong malisud alang nimo ang paghimo og bisan unsa kun halayo kini sa imong pagbati ug pagtuo. Sa atong pagpuyo ning kalibutan mahinungdanon nga atong Makita ang lihok sa Dios diha sa uban nga sa ato pa, dili kita ang bugtong naghupot sa kamatuoran. Ang kamatuoran ingon nga kinatibuk-ang siga mopadilaab sa kalayo ginamit ang nagkadaiyang sugnod sa pinulongan, kaliwat ug bansagon…..sa laing bahin akong pasalamat sa mga kaparian sa parokya ni San Jose sa Mabolo ug sa tanang mga taga Mabolo sa paghatag namo og kahigayonan aron mohimo ning Mission Appeal karong Domingoha. Salamat kaayo ninyo!