Tungod sa kasinatian

SEPTIYEMBRE 9,2018: Ikakawhaa’g-tulo nga

Domingo sulod sa tuig

MGA PAGBASA: Is. 35;4-7/Sal. 146/San. 2;1-5/Mk. 7:31-37

Mahimo kitang mga amang o mga bungol kini tungod kay mahimong komportable kita sa bakak o dili kita buot mosulti sa matuod o dili kita buot maminaw sa kamatuoran kay kini sakit kaayo sa atong dalunggan. Ang gihimo ni Hesus nga pag-ayo sa bungol ug amang maoy iyang paagi sa pagbalik sa maong tawo ngadto sa naandang kutay sa tawhanong kalambigitan. Ning paagiha nahimong balik sa normal ang maong tawo. Tinuod dili mamahimong hingpit ang atong kinabuhi apan kon maantigo lamang kitang mobuhi sa kagahapon nga nakapabungol ug nakaamang nato nan, mamahimong mas normal ug malinawon ang atong pagkinabuhi.  Ato kining mahimo tinabangan sa grasya sa Diyos ug ato kining mahimo kon kita magmanggihatagon lang sa atong kaugalingon diha sa pagsulti sa tinuod ug sa pagpaminaw sa tinuod.