Gustong motukod og negosyo

Dear Atty. Divine:

Nagplano ko nga magnegosyo og gamay nga grocery sa among lugar. Duna na koy nakit-an nga pwesto nga kaabangan duol sa merkado sa among lugar.

Gusto unta nako nga mamahimong legal gyud  ang akong negosyo, unsay akong buhaton aron makasugod ko sa akong business? Daghang salamat. — Jessa

* * *

Dear Jessa:

Ang una nimong buhaton mao ang pagrenta sa lugar nga imong nagustuhan so dapat naa moy Contract of Lease sa pwesto nga adto ka maninda. Kon naa na kay Contract of Lease moadto ka sa  Department of Trade and Industry or DTI aron imong iparehistro imong business as sole proprietorship, human  sa DTI kon naa kay Certificate of Registration gikan sa DTI, mokuha dayon ka og business permit sa inyong munisipyo ug human sa pagkuha og business  permit, magparehistro ka sa BIR  ug imong dad-on ang business tax certificate gikan sa munisipyo ug ang business registration from DTI ug ang Contract of Lease ngadto sa BIR ug human niini magpahimo ka og resibo.

Samtang nagdagan ang imong negosyo kinahanglan ka nga magbayad og monthly income tax, quarterly tax ug annual tax, mas maayo nga mokuha ka og bookkeeper alang niini.

Kinahanglan sab nimo nga i-renew ang imong business permit every year samtang ang DTI registration imong i-renew after 5 years. Thanks and God bless. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.