Giduphan sa kapolisan?

Sa mga nanghitabong patay dinhi sa dakbayan sa Sugbo karong panahona, kumbinsido na ang tanan nga dili na gayud kita luwas gikan sa mga kriminal. Gani morag insakto kining mga pangagpas sa pipila nga usa na ka “criminal city” ang Sugbo.

Niining kakuyaw sa panahon, maghilak ang adlaw kon walay mahitabong pagpatay sa siyudad ug ubang dapit sa lalawigan. Mura’g miligid kita pabalik ngadto sa panahon sa “Wild, Wild West didto sa Amerika.

Apan ang nakapatingala mao nga ang mga biktima, mga dagkong personalidad man o mga yamukmok sa katilingban, kadaghanan pulos man mga nalambigit kuno sa negosyo sa ilegal nga druga.

Mao nang daghan na hinuon ang naaghat pagtuo nga adunay koneksiyon gayud ang otoridad niining mga pagpatay sa Sugbo karon. Kon tinuod man, nan kabahin kini sa dakong kampanya sa kagamhanan pagsilhig sa mga nalambigit sa druga.

Ang maong pangagpas morag natinuod sa dihang usa ka pulis ang gialegar nga molikidar unta sa kanhi kapitan ug karon konsehal sa Barangay Tejero niining dakbayan. Apan walay swerte ang maong pulis kay siya man hinuon ang natumba sa dihang naunhan kini pagpusil sa driver sa maong opisyal.

Haskang panagang sa liderato sa Police Regional Office-7 gikan sa maong alegasyon. Matud sa direktor sa PRO-7 nga nagpahigayon lamang og monitoring ang pulis sa maong barangay atol sa maong insidente.

Mismong si Mayor Tomas Osmeña ang nagtuo nga adunay proteksiyon sa kapolisan kining mga nagpaluyo sa mga pagpatay karon sa Sugbo sa mga giingong nalambigit sa druga. Hinuon dali nga nakaalma si Cebu City Police Office director Royina Garma niini ug gihagit ang mayor pagpagawas og ebidensiya sa iyang akusasyon.

Hinuon wala pay konkreto nga basihan kon ang kapulisan ba gayud ang nagdupa sa mga mamumuno niining serye sa mga pagpatay karon. Apan dili usab nato mabasol ang publiko nga mopunting sa ilang tudlo ngadto nila tungod lagi kay daghang insidente sa mga pagpatay sa nasud diin adunay mga ebidensiya nga mismo ang kapolisan maoy nagpaluyo.