EDITORYAL - Kalinaw sa Mindanao

Karon nga nausa na ang bersyon sa Senado ug Kongreso bahin sa giduso nga Bangsamoro Basic Law (BBL) nga gituohan sa mga magbabalaod nga makapasar ug dili makalapas sa Konstitusyon, nagkaduol na ang kahayag sa kalinaw sa Mindanao. Ang BBL nga pipila na ka nangaging presidente nga wala gyud molahutay, gitawag na karon nga “Organic Law for the Bangsamoro Autonomous Region in Muslim Mindanao.”

Puli kini sa political entity nga Autonomous Region in Muslim Mindanao (ARMM) nga diin wala matagbaw ang mga Pilipinong Muslim sa awtonomiyang gisaad. Gani, imbes nga makatabang, gipasanginlan kining nahimong instrumento sa kurapsyon ug pag-ulog-ulog lang sa imperial Manila kanila. Apan sa bag-o unyang awtonomiya sa Bangsamoro Autonomous Region in Muslim Mindanao, mas daghan kini og awtonomiya nga maoy gustong mahitabo sa mga Muslim didto.

Dako usab kini og kalainan sa ARMM kay kaniadto bugtong ang Moro National Liberation Front lang, ug wala mosalmot ang mas dakong rebeldeng grupong Moro Islamic Liberation Front (MILF) sa pagkahulma niini. Karon ang Bangsamoro Transition Commission (BTC) nga maoy naghimo sa draft sa BBL, gilangkoban sa mga importanteng sektor o pundok didto. Nag-una niini ang MILF ug MNLF ug uban pang pundok.

Tingali, hingpit kining mapirmahan sa taga Mindanao sab nga si Presidente  Duterte atol sa ikatulo niyang State of the Nation Address (SONA) karong Hulyo 23 ug magsimbolo kini sa pagsugod na sa kalamboan sa Mindanao. Apan mahitabo lang kining tanan kon moseryuso ang gobiyerno sa pagtuman sa kaakohan niini aron molampos ang BBL. Kon sama lang gihapon sa nangaging mga kasabotan, sama sa Tripoli Agreement tali sa MNLF ug gobiyerno ang himoon, gubot lang gihapon ang Mindanao.

Sa laktod nga pagkaestorya, naa ra sa gobiyerno ang antog karon. Kinahanglang mahatag ang gikinahanglan sa Muslim Mindanao regions aron sila makasugod dayon ug makaapas sa ubang rehiyon sa nasud.