Dili pa moretiro

Mora og nibalik na ang karaang estado ni Manny Pacquiao sa dihang iyang gi-knockout ang kampiyon nga si Lucas Matthysse sa ilang sangka sa Axiata Arena sa Kuala Lumpur didto sa Malaysia kaniadtong Domingo.  

Wala na makaagwanta pa si Matthysse sa mga nagpungasi nga opensiba ni Pacquiao, hinungdan nga na-down kini sa ikatulo ka higayon ug giluwa niini ang iyang mouthpiece.

Kini ang hinungdan nga gihunong sa referee ang maong sangka.

Milungtad lang og pito ka round ang maong kumbati nga gisaksihan og 16,000 ka tawo nga kadaghanan mga Pilipino, ug sulod sa maong hugna wala gayud makaharong ang kampiyon gikan sa Argentina.  

Human sa iyang gipakita nga maayong labok, mianunsiyo ang atong pambato nga dili pa siya moretiro ug padayon siyang makig-away sa mga tang-an sa iyang dibisyon.

Gani, nagplano siya nga mosaka pag-usab sa ring karong Disyembre.

Apan sa edad nga 39, klaro nga milapas na ang pagkahinog sa career ni Pacquiao. Kaniadto pulos gipangtumba niya ang iyang mga kontra, apan niining panahona, kontento na lang ang Pilipinhong kampiyon nga modaog sa puntos. 

Dili na gyud mabalik pa ni Pacquiao ang iyang kapaspas ug kakusog sa panahon sa iyang kabatan-on. Kini bisan pa sa atong nakita nga aduna pa siyay dakong ikabuga sa boksing human niya gipatumba si Matthysse.

Mao gani nga daghan ang nabalaka karon kon mopadayon pa ba siya sa iyang propesyon sa boksing niining panahona nga nagkasalop na ang iyang career, tungod lagi kay delikado kini sa iyang panglawas.

Kini ilabi na nga sa iyang dibisyon, daghan sa mga tang-ang batan-on ang nag-alirong. Anaa si Terrence Crawford, kinsa gituboy karon isip nag-unang pound-for-pound nga boksidor sa kalibutan, ug ang bagsik usab nga si Errol Spence.

Hasta si Presidente Rodrigo Duterte ang nabalaka kang Pacquiao. Tambag niya nga mas maayo pa nga moretiro na lang ang senador sa pamoksing tungod sa iyang pangedaron. Kabahin sa salapi, subra na ang kadato sa boksidor, matud pa sa presidente.

Hinuon, si Pacquiao lang ang makadesisyon kon kanus-a siya moretiro. Mora og mopadayon pa siya sa pamoksing base sa iyang pamahayag.

Apan wala na siyay ipakita pa ibabaw sa ring. Hilabihan na kadako ang kabilin ni Pacquiao sa maong paugnat sa kusog ug mas maayong moretiro siya nga walay tatsa.