EDITORYAL - Kinahanglang Imbestigahon

Dili matukib sa pulong ang gibating kaguol sa mga ginikanan ug kaparyentihan sa kwatro-anyos nga batang lalaki nga napatay human maigo sa saag nga bala atol sa usa ka police operation sa Sitio Bato, Barangay Ermita kaniadtong Martes sa hapon.

Angay gyud nga imbestigahon pag-ayo kining maong hitabo ug dili kay moingon lang ang kapolisan nga dili sila maoy nakapatay sa bata, ug ipahid ang kamatayon sa bata ngadto sa ilang mga dakponon nga kuno maoy nagpataka og pabuto’g armas ug aksidente nga nakaigo sa biktima.

Isip direktor sa kapolisan dinhi sa Dakbayan sa Sugbo, si Senior Superintendent Royina Garma, angay’ng momando dayon og paspas nga imbestigasyon. Apil si Konsehal Dave Tumulak nga maoy gitudlo nga deputy mayor for police matters, angay’ng magpakabana niini.

Apan yuna pa, molampos lang ang imbestigasyon kon adunay ebidensya nga nakuha ang mga imbestigador sa kapolisan. Ang pangutana kon may nakuha ba sila nga “slug” nga maoy nakaigo sa biktima ug may kapsola ba sa bala nga nakit-an sa dapit nga nahitaboan?

Ang mga lumolupyo sa maong dapit makatestigos man gyud kon tinuod ba nga ang kapolisan wala makapabuto sa ilang armas atol sa ilang operation. Mamatud-an lang nga walay bisan usa kanila nga nakapabuto kon kadtong mga miapil sa operation kaniadtong Martes, pakuhaan og paraffin test.

Unya, ang isyu nga mga armas niadtong mga polis nga miapil sa pagpangronda, isumiter usab og ballistics examination sa PNP Crime Laboratory Service, aron itandi ang slug ug kapsola, kon gikan ba gyud kini sa armas sa kapolisan.

Kon dugay-dugayon ang pag-paraffin test sa maong mga polis nga miapil sa operation didto sa Sitio Bato, Ermita kaniadtong Martes, mahimong molapas na ang 72 oras gikan sa hitabo, ug basin lisud na nga mailhan kon kinsa ang nakapabuto sa kapolisan, pananglit polis man ang nakaigo sa bata.