Polis nangulata

Gireklamo ni Angelina Barasona sa akong programa sa DySS Super Radyo Cebu ang mga polis nga sakop sa Station 3 sa Dakbayan sa Lapu-Lapu tungod sa pagpangulata niini ngadto sa iyang anak nga ilang gidakop.

Naghilak si Barasona nga miasoy sa nahitabo sa iyang anak. Matud niya nga kaniadtong Hunyo 12, gidakop sa mga polis ang iyang anak nga si Jembo, kinsa igo lang nagpalit og ice water sa tindahan.

Matud ni Barasona nga gisumbag sa polis ang iyang anak. Dili pa igo, ilang giguroy paingon sa ilang balay si Jembo ug didto gitabangan og kulata sa mga polis.

Ang mga polis nga gireklamo mao sila si SPO2 Rodrigo Inoc, PO2 Junell Mayola, PO2 Adriane Yonting, PO1 Benhur Cuadra Jr., PO1 Romeo Aneslagon Jr. ug PO1 Jhon Paul Sojor.

Gireklamo usab ni Barasona ang gihimong paglipatlipat sa mga polis kanila sa pagpaubos sa iyang anak sa medical examination. Matud niya nga iyang gikuyogan si Jembo didto sa Lapu-Lapu City District Hospital human dad-a sa mga polis aron ipaubos sa medical examination.

Niadtong panahona naglingkod lang tawon sa daplin ang iyang anak nga nagsige og reklamo sa kasakit sa iyang lawas.

Human sa pipila ka oras nga pagpaabot, wala gyu’y doktor nga mihiling sa iyang anak. Dayon, giingnan sila sa polis nga mobalik na sila sa polis station kay humana ang medical examination.

Si Police Senior Inspector Joey Mallare Bicoy, ang hepe sa Station 3 nga nahinabi nako atol sa akong programa, miingon nga subject sa ilang buy-bust operation si Jembo, diin nakuhaan nila og 20 ka pakete sa gituohang shabu.

Hinuon, mipasalig si Bicoy nga iyang imbestigahan ang pasangil ni Barasona. Gipasalig usab niya nga walay mahitabo ni Jembo samtang anaa sa ilang kustodiya.

Manghinaot lang ko nga dili lang kutob sa sulti si Senior Inspector Bicoy kabahin sa reklamo nga gipaabot kaniya.