RTWPB-7 tihik

Dihang gipahibawo sa Regional Tripartite Wages and Productivity Board (RTWPB-7) nga ilang giuyonan ang paghatag og P20 nga umento sa suholan sa mga anak sa singot sulod sa Metro Cebu area, nakaingon ko sa akong kaugalingon nga maayo na lang kini kay sa wala, kay ang P20 gamay pero kon imong tigumon daku-dako na man pud kini nga paminawon.

Pero diha nga akong nabasahan sa GMA News Online nga ang RTWPB sa rehiyon 6 ug rehiyon 8, mihatag og mas dako nga umento sa suholan sa mga anak sa singot sa maong mga rehiyon, nakaingon ko sa akong kaugalingon nga tihik ang mga sakop sa RTWPB dinhi sa Central Visayas.

Base sa balita, ang RTWPB-6 nga anaa dinhi ang mga dakbayan sa Iloilo ug Bacolod, mihatag og P26.50 nga umento sa basic nga suholan ug P15 nga usbaw sa Cost of Living Allowance sa mga anak sa singot sa maong rehiyon.

Busa sa kinatibuk-an, miabot og P41.50 ang gihatag nga umento sa RTWPB-6.

Ang RTWPB-8, diin anaa dinhi ang dakbayan sa Tacloban, mihatag usab og P30 nga umento sa suholan sa mga anak sa singot sa maong rehiyon.

Busa kon ato nga sumadahon, sa kinatibuk-an nga rehiyon sa Visayas nga gilangkoban sa rehiyon 6, 7 ug 8, ang rehiyon 7 maoy labing tihik tungod kay mihatag lang kini og P20 nga umento sa suholan, mao nga nangutana na pud ko sa akong kaugalingon kon naghimo kaha sa ilang trabaho ang mga representante sa mga anak sa singot diha sa RTWPB 7?

Lupig ba ang atong mga representante sa pagpakiglantugi sa mga representante sa mga negosyante sa pagduso sa atong mga interes bahin pag-umento sa suholan?

Ang dili maayo nga performance sa atong mga representante sa RTWPB igo na ba kini nga ato silang ilisan?  Unsa kaha.