Bitaw nganong wa man iapil ang Cebu City?

Giingon nga si DOTr Secretary Arthur Tugade nakigtagbo sa lima ka tinugyanan sa World Bank, presumably, bahin sa BRT project. Apan dakong katingalahan nga wa ilakip sa maong tigum ang dakbayan sa Sugbo.

Ngano man ni? Wa na’y labot ang dakbayan sa Sugbo sa BRT, o gikombensir ang taga-World Bank sa dili na pagpadayon sa maong proyekto?

Hilabihan na ang kalangan ning maong proyekto. Daghan na nga mga pagtuon, mga feasibility studies ang gihimo, hinungdan nga giaprobahan na kini sa atong gobiyerno ug sa Word Bank. Ready na unta kini for implementation.

Apan tungod lang kay ang pipila sa mga kaatbang ni Mayor Tomas Osme?a wa makauyon sa iyang nawong, gawas nga gilangan-langan, buot nila nga i–scrap gayud ang maong proyekto. Pastilan, naunsa na gud intawon ta niini uy?

Matud nila maghimo pa sila og ‘further studies’, dugang mga pagtuon. Unsa man diay kadtong mga pagtuon nga gihimo sulod sa kapin napulo ka tuig nga maoy gibasehan sa pag-approve sa hingtungdang mga ahensiya sa gobiyerno ug sa World Bank mismo, bali wala na lang to?

Karon, tungod kay mao may gusto sa DOTr nga kanselahon ang BRT project, kay dili kuno feasible sa sitwasyon sa kadalanan sa Cebu City ug nga dili makasulbad instantly sa suliran sa trapiko sa dakbayan.

Tungod niini, si Socioeconomic Planning Secretary Ernesto Pernia mihatag og tagal sa DOTr hangtud sa Hunyo 30 sa pagsumitir og mas lig-on o “robust evidence” batok sa BRT. Sa ato pa, dili mosugot si Pernia nga tungod lang kay wa makauyon sa nawong ni Osme?a ang iyang mga kaatbang sa politika, kanselahon na ang proyekto. Nindot ni nga kaugmaran.

Ug maoy atong panghinaot nga masulbad na kining maong sitwasyon, either ipadayon, o kanselahon for good ang maong proyekto. Ug kon ibasura, kinahanglan adunay ikapuli nga mas superior, ug mas feasible nga proyekto nga makahatag og immediate nga solusyon sa suliran sa trapiko sa dakbayan.

Ug please, Mr. Tugade, ayaw padala ug ayaw pa-influence sa politika. Nakahunahuna ka ba’g lansar pagka-senador?

* * *

Dakung garbo kanatong mga Sugbuanon nga bisan si Presidente Digong Duterte naibog sa katahom ug ka-moderno sa bag-ong Terminal 2 sa Mactan-Cebu International Airport nga anaa mahimutang sa Lapu-Lapu City.

Kadaugan kini sa panagtambayayong sa gobiyerno ug sa private sector pinaagi sa PPP kon Public Private Partnership nga initiative sa kagamhanan. Dili ba kaha ni ma-apply sa MCWD no?