Mga bakak sa BRT

Grabe ang paninguha sa kampo ni Mayor Tomas Osmeña nga mahinayon gyud ang Cebu BRT Project, bisan og gitun-an na sa nasyonal nga kagamhanan ang paghunong niini tungod sa kagagmay og karsada sa dakbayan sa Sugbo. Ngano kaha nga puwerte man gyud nga paninguha sa grupo ni Tomas?

Unang lakang nga ilang gihimo mao ang pagpagawas og banner sa pamantalaan (dili sa The Freeman ug Banat News) nga nagtuis sa live video sa speech ni DOTr Secretary Arthur Tugade nga migawas sa Facebook. Sa live video, si Tugade miingon nga sa inengles “okay nga sistema ang BRT, apan maayong himuon lang kini sa ‘ground zero’ kun sa mga lugar nga dili pa congested.”

Apan daw tinuyo ang pagpagawas nga mi-okay na si Tugade sa BRT pinaagi sa pagputol sa pamahayag sa kalihim sa DOTr. Sa maong balita, gi-quote si NEDA Secretary Ernesto Pernia. Pagkasunod adlaw, gipagawas dayon ang pamahayag ni Pernia nga maayong ihatag na lang sa siyudad sa Sugbo ang pag-implementar ug pagdumala sa BRT. Ha? Siyudad sa Sugbo ang modumala sa BRT?

Wala man gani makailis ang kagamhanan sa siyudad sa traffic lights nga mga 1980s pa nagbitay, modumala na hinuon og BRT nga wala man intawon kita’y kasinatian ug kapabilidad pagdumala bisa’g tartanilla man lang? Ikaduha, ang siyudad sa Sugbo maisip nga benepisyaryo lang sa BRT project. Wala’y apil sa loan agreement sa World Bank ang siyudad. Kon ihatag sa siyudad sa Sugbo ang pagdumala sa pundo, unya’g iwari-wari sa mga kanahan sa City Hall ang pundo gikan sa loan, unsa may “accountability” sa kagamhanang lokal sa Sugbo?

Ikatulo, ang DOTr maoy proponent sa BRT project. Kay lagi, ang siyudad benepisyaryo lang sa proyekto. Busa, dili ingon niana kasayon nga ihatag lang sa siyudad “in silver platter” ang BRT project. Dili ikahibulong nganong si Pernia suporta kaayo sa BRT, kay paryente siya ni Kongresista Raul del Mar nga alyado kaayo ni Tomas. Apan si Pernia dili makabuot-buot sa kaugmaon sa BRT. Busa dili katuohan sa iyang pamahayag nga mahimong ihatag sa kagamhanan sa siyudad ang pagpatuman sa BRT.

Sa katapusang NEDA ICC, gitun-an na unsaon pagkanselar sa BRT. Sa mga sakop niini, si Pernia lang ang uyon. Gani, si DPWH Secretary Mark Villar miingon atol sa sesyon sa NEDA-ICC nga dili angayang ipugos ang BRT kay ang proponent niini, ang DOTr, mi-scrap na niini.

Hangtod nga dili si Tugade ang mosulti, ang mga estorya nga buhi pa ang BRT dili katuohan. Apan kon nahibulong kamo nganong ipugos gyud ang BRT, aw, eleksiyon na sunod tuig. Ang mga politiko nangita na karon og campaign fund.