“Three-cornered fight”

Nangangkon si Cebu City Mayor Tomas Osmeña nga dunay nahitabong panagbingkil karon sulod sa Team Rama. Ang pamahayag sa mayor dali hinuon nga gihimakak ni Konsehal Joel Garganera, usa sa mga miyembro sa Team Rama.

Mahimong tinuod, mahimo sab nga intriga lang ang gitug-an sa mayor. Apan dili imposible nga mabuak gyud ang grupo sa oposisyon sa dakbayan kon wa’y usa nilang Bise Mayor Edgardo Labella ug kanhi mayor Michael Rama ang andam mosakripisyo sa ilang tagsa-tagsa ka ambisyon nga mokandidato pagkamayor sa sunod eleksiyon.

Sa akong tan-aw disidido gyud si Rama nga makigsangka pag-usab ni Osmeña. Sa pikas bahin, dayag sab ang kaikag ni Labella nga magmayor, labi pa nga mas duna siyay dakong purohan nga maoy ituboy sa PDP-Laban.

Gani duna na’y “Labella for mayor movement” nga akong nakit-an diha sa Facebook. Dili pa hinuon ingon niana ka daghan ang followers ug likers, apan nagpakita ni nga dunay mga tawo nga gustong si Labella mokandidato. Sa akong katapusang pagtan-aw sa maong Facebook Page aduna pa lang kini’y walo ka followers ug walo sab ka likers.

Sa ato pa, posibleng mahitabo ang “three-cornered fight” pagkamayor dinhi sa dakbayan karong 2019. Sa akong tan-aw mao sab ni ang gustong mahitabo ni Osmeña. Mas sayon alang ni Osmeña ang pagdaog kon mabahin ang oposisyon. Kini tungod kay mabahin man sab ang ilang mga dumadapig samtang ang mga supporters sa Bando Osmeña Pundok Kauswagan magpabiling kumpleto.

Busa kon buot ang oposisyon nga mas lig-on silang moasdang batok ni Osmeña, mas labing maayo og magsabot silang Rama ug Labella kinsa nila ang mopapili. Pipila sa mga butang nga angayan nilang tamdan sa paghimo og disisyon mao ang mga isyu batok ni Rama nga magsilbing dakong babag sa ilang kadaogan.

Una, nagkahilis na ang gidaghanon sa iyang mga kapitan. Makita ni sa resulta sa miaging barangay election. Ikaduha, hangtud karon wala pa mapapas ang lama sa pasangil ni Presidente Rodrigo Duterte nga siya nalambigit sa illegal nga drugas.