Lipat-lipat sa PDEA

Daghan ang wala motuo sa labing ulahi nga listahan sa mga opisyal sa kabarangayan nga gipasanginlang nalambigit sa ilegal nga drugas.

Sama sa unang listahan nga gipahibawo mismo ni Presidente Rodrigo Duterte, daghan ang mga pangutana nga wa’y klarong katin-awan unsa’y gibasehan sa Philippine Drug Enforcement Agency sa maong lista.

Usa sa nahibulong kaayo sa listahan mao si Cebu City Mayor Tomas Osmeña. Dili makatuo ang mayor nga wa’y bisan usa sa mga opisyal sa kabarangayan dinhi sa dakbayan sa Sugbo nga nalambigit sa drugas.

Nagkanayon si Osmeña nga duna siya’y nasayran nga usa ka barangay sa south district nga hapit kuno tanang opisyal ang nalambigit. Base sa listahan nga gipagawas sa PDEA, tulo lang ka kanhi barangay kapitan sa Sugbo ug tibuok Central Visayas ang nalakip sa 207 ka pangalan.

Sila mao si Ramonette Durano nga kanhi kapitan sa Barangay Suba sa Danao City; kanhi kapitan Bibiano Cabaron nga karon konsehal na sa lungsod sa Ronda ug Marc Ferdinand Bas, kanhi kapitan sa Lagtang, Talisay City.

Kon tinuod nga misubay og kuti nga proseso ang PDEA pagmugna sa maong listahan, nganong klarong dili updated ang ilang kasayuran? Unsa’y ilang gibasehan paglakip sa maong mga pangalan sa ilang listahan? Unsa’y ilang ebidensiya ug nganong wa sila’y kasong napasaka batok sa maong mga kanhi barangay officials?

Matud hinuon sa tigpamaba sa PDEA-7 nga si Leia Albiar, dili pa angayang maghudyaka ang mga opisyal nga wala malakip sa lista tungod kay nagpadayon pa ang ilang validation. Matud ni Albiar nga ilang pasakaan og kaso ang mga naapil sa listahan.  Sayon ang pagpasaka og kaso apan mobalik ko sa pangutana, unsa may inyong ebidensya?

Kanus-a man sab ninyo ipagawas ang sunod nga listahan, unya na human sa eleksiyon? Dili ba nga ang rason nganong nagpagawas ang PDEA og lista aron magiyahan ang mga botante sa umaabot nga barangay ug SK elections nga dili mobotar sa mga nalambigit sa drugas? Tinuod ba nga seryuso sila sa ilang gihimo, o igo lang nilang gilipat-lipat ang publiko?