Kinsa’y manubag kon makahimo og kadaot ang menor de edad?

Dear Atty. Divine,

Ang 10-anyos nga anak sa akong silingan nagduwa sa gawas sa among balay. Kuyog niya ang iyang mga barkada nga bata ug naglabay-labay sila og bato.

Paglabay sa bata nga anak sa among silingan, ang bato didto motugpa sa akong sakyanan nga gi-park. Tungod niini nabuak ang bildo sa bintana sa akong sakyanan.

Ang akong pangutana kon maka-demand ba ko og bayad gikan sa  mga ginikanan sa bata tungod sa kadaot nga iyang nahimo sa akong sakyanan? Daghang salamat. — Clint

Dear Clint,

Base sa atong balaod (Art. 2176 og Art. 2180) sa New Civil Code, kini nagkanayon nga kon ang tawo makahimo og kadaot sa iyang isigkatawo, o sa bisan unsang butang, obligado kini nga makabayad tungod sa iyang pagpabaya.

Apan kon bata ang makahimo og kadaot, o damage, ang amahan, o inahan sa bata maoy obligado nga mobayad sa kadaot nga nahimo sa iyang anak nga menor de-edad.

Kini tungod kay ang bata ubos sa iyang custody ug sa iyang supervision and control. Busa sa imo nga kaso, aduna kay katungod nga mo-demand og bayad gikan sa mga ginikanan sa bata nga nakabuak sa bildo sa imong sakyanan. Thanks and God bless.- Atty. Divine

Alang sa inyong.pangutana, ipadala lang sa Legal Corner sa Banat News sa V. Gullas St., Cebu City or email sa flores [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.