Lista sa PDEA

Mipagawas na ang Philippine Drug Enforcement Agency sa lista sa mga opisyal sa barangay sa tibuok nasud kinsa giingon nga nalambigit sa negosyo sa ilegal nga druga. Ug sa 207 ka opisyal nga ginganlan sa PDEA, tulo ang ania sa lalawigan sa Sugbo.

Sa mao nga lista, anaa ang mga ngalan sa kanhi kapitan didto sa dakbayan sa Talisay, dakbayan sa Danao ug lungsod sa Ronda.

Apan sama sa uban nga mga ginganlan sa kagamhanan nga mga lokal nga opisyal ug kapolisan kaniadto, nanghinaw ang kampo sa mao nga mga opisyal sa barangay sa ila nga kalambigitan sa druga.

Apan daghan ang nahibulong tungod kay ang ginganlan sa PDEA dinhi sa Sugbo pulos man mga kanhi nga kapitan sa barangay. Nagpasabot ba kini nga ang kasamtangan nga mga kapitan ug konsehales sa probinsya pulos mga tarong ug wala gayud malambigit sa druga?

Sa dakbayan sa Sugbo, nahibulong pag-ayo si Mayor Tomas Osmeña, ngano nga wala’y naapil sa lista tungod kay dugay ra’ng gidungog nga adunay mga opisyal sa barangay dinhi nga nalambigit sa negosyo sa druga.

Bisan ako, dako usab og kahibulong ngano nga wala gyu’y mga opisyal nga naapil sa lista sa mga lugar dinhi sa Sugbo diin notoryos na sa druga.

Misaad ang kadagkoan sa PDEA nga ila gayud nga kasohan kining mga barangay officials nga anaa sa listahan.

Apan ambot kon may lig-on ba nga ebidensya ang otoridad batok sa mga badlongon nga mga opisyal sa barangay inig taral na unya kanila sa hukmanan.

Kini gumikan kay mora man og wala gani mosaler ang pagngalan sa kagamhanan sa giingon nga mga local government officials nga nalambigit sa druga kaniadto. Karon mora’g wala ko makadungog og lokal nga opisyal nga anaa sa listahan nga nameligro karon atubangan sa husgado.

Hinuon daghan sa mga gihinganlan ni Presidente Rodrigo Duterte kaniadto ang hagbay ra nga na natiklo pinaagi sa dugoon nga hustisya sa bala. Kini sama kang Albuera, Leyte Mayor Rolando Espinosa, Ozamiz City Mayor Reynaldo Parojinog ug pipila ka sakop sa kapolisan.

Apan karon nga ginganlan na sa otoridad kadtong giingon nga mga opisyal sa barangay nga nalambigit sa druga, dako kaha kini og epekto sa umaabot nga eleksiyon? Ug nga husto ba gayud si Presidente Duterte sa iya nga sugyot pag-postpone una sa eleksiyon sa barangay karong tuiga?