EDITORYAL - Garbo sa mga probinsyano

Sulod sa nakalabay’ng duha ka tuig nga gidominar sa mga law schools gawas sa Metro Manila ang labing lisud nga pasulit sa nasud, ang Bar examination. Sa miaging tuig, law student sa Cebu City ang ni-top, kauban ang lain pa nga mga tinun-an sa abogasiya nga gikan gihapon sa probinsya. Pipila lang gikan sa mga top law schools sa kaulohan ang nakasulod sa Top 10, samtang dakong porsiyento gikan sa mga tinun-an sa Sugbo nga taas kaayo ang passing percentage rate matag Bar exam sulod na sa nanglabay’ng katuigan.

Sa Bar exam niadtong 2017, nga ang resulta nigawas kaniadto lang Huwebes, nag-una lang gihapon ang mga provincial law schools. Ang Top 1 gikan sa Bacolod City ug gisundan sa mga taga Cebu City ug uban pa nga mga tinun-an gikan sa ubang probinsya. Adunay mga lakang kaniadto nga nagtinguhang i-regionalized ang Bar exams aron dili na kinahanglang mogasto og dako ang mga mokuha sa maong pasulit.

Sa pagkakaron, ang Korte Suprema wala pa motugot niini mao nga pabiling sa Metro Manila lang gihapon himuon ang Bar exams, hinungdan nga daghang nikuha niini nga nagkautang-utang aron adunay ikabayad sa abang sa balay, pagkaon, pamelete, panggastos sa usa ka buwan nga pag-estar didto. Maayo na lang unta kon makadaginot ang mga estudyante bisan og gamay kay sa pag-eskuyla pa lang nila, dako na kaayo ang ilang gastos, apil ang pag-review aron makadugang sa kahigayonan nga sila makapasar.

Apan tingali, adunay nakita ang Korte Suprema nga risgo kon i-regionalize, ug mawagtang na unya ang kalimpyo sa maong pasulit ug basin mamantsahan hinuon og mga pagduda. Ang pagpasar sa mga estudyante sa abogasiya gikan sa mga probinsya, angay nga ikapasigarbo sa mga probinsyano. Angay usab pasalamatan ang mga institusyon nga nagtabang sa mga tinun-an nga makab-ot ang ilang mga damgo.