Ang gugma

Ang naghingapin nga gugma mopatay nimo. (Too much love will kill you), matud pa sa ulohan sa kanta nga gipasikat ni Jovit Baldivino. Ang gugma makapasakit (Love Hurts), matud pa sa ulohan sa kanta nga gipasikat sa banda nga Nazareth. Kini ang mga ulohan sa kanta nga naghulagway sa gugma.

Sa pagkatinuod, dili nato maihap ang gidaghanon sa mga ulohan sa kanta nga naghulagway sa gugma. Adunay kanta nga nagbatbat ug naghulagway sa gugma nga tam-is, pait, sakit, dili makakita, katingalahan ug dili masabot.

Akong gihisgotan dinhi ang gugma, tungod sa sagunson nga panghitabo sa dakbayan sa Mandaue nga naglambigit sa gugma. Ang labing ulahi nga hitabo mao ang sa Barangay Labogon nga gidunggab ug gitigbas sa makadaghang higayon ang usa ka ginang tungod sa pangabubho, o selos.

Segun sa balita, namatay si Analiza Lacno, 42, ug minyo human siya gidunggab ug gitigbas sa makadaghan nga higayon sa iyang bayaw nga si Danilo Lacno, 41, nga iyang nauyab, tungod sa pangabubho o selos. Si Analiza ug Danilo, maoy unang nagkauyab, apan napuhalan si Danilo sa iyang maguwang, ug mao kini ang giminyoan ni Analiza, ug nakabaton sila og mga anak. Apan nagkabulag ra sila si Analiza ug ang maguwang ni Danilo.

Wa maglangay si Danilo, iyang gibalikan si Analiza ug gidugtong nila pagbalik ang nabugto nilang relasyon, ug nagtipon sa usa ka balay.

Apan si Analiza, duna pud diay uyab nga usa ka jeepney driver. Dinhi nagsugod ang kalbaryo sa gugma ni Danilo tungod kay sa adlawan lang siya kuyog ni Analiza kay ang babaye adto makigdulog sa jeepney driver inigkagabii. Bisan sa hangyo ni Danilo nga sila na lang gyud ang magtipon, apan gibaliwala lang kini ni Analiza.

Tungod niini, gipatay ni Danilo si Analiza, ug dayon nagpakamatay usab siya. Husto ang ulohan sa kanta ni Jovit Baldivino nga “Too much love will kill you” ug ang kanta sa Nazareth nga Love Hurts.