Biyahe sa Camotes

Sa niaging mga adlaw nakadalikyat ako ug ang akong pamilya pagbakasyon didto sa isla sa Camotes. Basta moabot na gani ang ting-init, usa sa amo nga plano mao ang paglawig ngadto sa San Francisco, ang usa sa upat ka lungsod sa Camotes diin natawo ang ako nga asawa.

Sukad sa una nako nga pag-adto sa mao nga isla kaniadtong dekada 2000s, dako na kaayo ang kausaban sa Camotes. Kini tungod kay gidugok na kini og mga turista. Ang kaniadto wala mailhi nga isla sa northern Cebu usa na karon sa nag-una nga atraksiyon sa turismo sa probinsiya.

Sukad pa kaniadto, panguma ug pangisda ang nag-una nga panginabuhian sa mga lumolupyo didto. Apan karon, liboan ang nakabenepisyo sa kusog nga paglambo sa turismo didto, gikan sa pagpamaligya og mga native product hangtud na sa pagnegosyo og sakyanan nga paabangan sa mga turista.

Nag-una nga ikapanghambog sa Camotes mao ang nindot nga mga beach niini. Ang mga white sand niini sama gayud sa Boracay.

Mao gani nga tungod sa kagubot sa Boracay, wala gyud ko maibog sa mga beach didto tungod kay mas nindot pa ang mga beach sa Camotes nga sige namo nga kaligoan.

Apan dili lang beach ang imo nga masuroyan kon tua ka sa Camotes. Anaa usab ang nabantog na nga Lake Danao diin liboan ang mobisita matag-adlaw.

Adunay mga langub usab nga paborito nga i-explore sa mga turista. Kon gusto ka mag-hiking, adunay diay lugar nga gitawag og “Kalbaryo” nga makita gayud nimo ang view sa tibuok isla.

Sa mga gusto nga moadto sa Camotes, dili na kamo magproblema og kasakyan gumikan kay hamogaway na ang inyo nga pagbiyahi. Adunay barko nga mobiyahe gikan sa pier sa dakbayan sa Sugbo.

Apan mas nindot kon adto ka manakayan sa dakbayan sa Danao tungod kay tua didto ang daghang barko nga mobiyahe paingon sa Camotes.

Hinuon, tungod sa kadaghan sa mga turista nga mohugop sa mao nga isla, kinahanglan nga sayo gayud ang inyong pag-book sa mga resort didto.

Gani, niadtong January pa kami naka-book sa Mangudlong Rock resort aron pagsiguro tungod sa nagbaha nga turista nga molawig sa mao nga isla panahon sa ting-init.

Niining desisyon sa national government pagsira sa Boracay, gitagna nga mosulbong unya ang bul-og sa mga turista nga moduaw sa Camotes. Ug hinaot nga dili kini moresulta sa pagkagusbat sa mao nga isla. Ambot kon unsa ka andam usab ang otoridad niini.