Ang hagit sa botante

Madayon na gayud ang eleksiyon karong Mayo 14, ug tungod niini, daghan ang mokandidato. Kasagaran kanila managkaila ug silingan ra, busa mahimbisan gayud pag-ayo ang mga kandidato kon buot sa mga botante.

Sa ilang pagkasilingan, nakaila gayud sila sa pagkatawo sa mga kandidato. Mao ni ang kalainan sa eleksiyon sa barangay ug sa nasudnong piniliay nga daugon lang kon kinsa ang sikat.

Apan lahi ang barangay elections kay dili lang ang kailado, o kasikat sa kandidato ang basehan sa mga botante. Sa barangay elections, dili mapadaplin sa mga botante ang ilang kasinatian sa pagkatawo sa kaila ug silingan nga mikandidato.

Mao nga anaa sa eleksiyon sa barangay ang dako nga hagit sa mga botante kay mag-ilog man sa ilang huna-huna ang maayo ug dili maayo sa kandidato.

Sama pananglit sa kandidato nga sikat, pero dili makamao. Sikat pero wala’y panahon sa pag-atiman sa iyang trabaho sa barangay. Kandidato nga maayong tawo pero ubos lang ang kahibawo.

Maapil pud sa pagkonsiderar sa botante sa barangay elections ang personal nga mga butang ug binuhatan sa mga mikandidato, sama sa pagkabati og batasan niini, ug sa wala pagpanghatag og asin.

* * *

Wala’y nakita nga suliran ang Comelec kon ipagawas sa kapolisan ang listahan sa mga narco politicians nga mokandidato sa eleksiyon karong Mayo 14. Apan ang kapolisan miingon nga bisan pa kon ipagawas nila ang pangalan sa mga narco politicians, dili sila makapugong niini kon sila magpapili sa umaabot nga barangay elections.

Wala na kinahanglana ang pagpagawas sa listahan sa mga narco politicians kay dili kita makaseguro kon tinuod ba kini, sama sa kaso ni Mayor Tomas Osmeña.

Ang mayor wala sa listahan sa polis ug PDEA, pero gipasanginlan siya nga nakadawat og P7 milyones gikan sa drug lord nga si Jaguar, matud sa ig-agaw ni Jaguar nga si Reynaldo Diaz.