Tapulado Reflectorized vest dili na kinahanglan
Ang konseho sa dakbayan sa Sugbo miumol og ordinansa nga kutob sa mga tawo nga magmaneho, o nagsakay’g motorsiklo, o scooter sa gabii, kinahanglang magsul-ob og reflectorized vest aron kuno kalikayan ang disgrasya. Ang dili motuman dakpon ug pamultahon og mas mahal pa kay sa multa nga gipahamtang niadtong nangasikop sa pag-counterflow sa traffic.
Para kanako, dili kaayohan sa katawhan ang tumong sa maong balaod, kon dili, makadaot hinuon kini sa pobreng bulsa sa mga motorista. Ning grabeng pagsaka sa mga palaliton, monunot usab ang pagtaas sa presyo sa reflectorized vest.
Mga konsehal, bugas intawon uy, ang gihatagan og prayoridad sa tawo nga paliton, ug dili reflectorized vest! Daghan baya ang nagkalisod karon. Unya, inyo pa nga pun-an? Hain na man diay ang kalumo sa inyong kasingkasing nga pirme ninyong ipakita panahon sa eleksiyon?
Basi’g nalimot mo nga dili tawon na sila isla-isla nga magdagtom tunga sa karsada ini’g kagabii, kon dili, mga kinabuhi silang nagdagan nga maoy nagkinahanglan og suga sa kadalanan.
Niadtong nagdrayeb ko sa akong una nga kotse ug miagi ko sa Marcelo Fernan Bridge, mipisikpisik ang kayo gikan sa yantas sa ligid nga nabag-id sa center island nga abi nako’g anino lang sanglit wa man gyu’y reflector nga gibutang niini.
Gani, napasiyagit sa kakuyaw ang akong misis nga diha maglingkod sa akong tupad, kinsa maoy nakaanghel nga nakabig nako sa hustong lane ang manobela ug kami nakalikay sa dugoong disgrasya.
Kining hitaboa, makahatag og pulidong kamatuoran nga ang problema wala diay sa mga motorista, kon dili, naa sa atong gobiyerno, kinsa nalimot sa pagtaod og mga reflector diha sa mga center island sa karsada ug ang wala’y pagpakabana aron kanunay unta nga hayag ang maong dalan.
Sa laktud, ang mga center-island sa karsada maoy angay’ng butangan og reflector ug dili ang lawas sa tawo. Busa, ang reflectorized vest dili na kinahanglan. Naa man ta’y balaod bahin sa Road Courtesy and Discipline. Kon hugot lang kining iimplementar, daghang kinabuhi sa dalan ang masalbar.
Bi, ato kuno ning sulayan, mga konsehal! Dili gyud necessity ang reflectorized vest. Makamugna lang hinuon ni og hugaw’ng hunahuna kon inyong ipamugos!
- Latest