Tam-is nga bunga sa kalisdanan

Duha ka managsuon nga parehong adunay Osteogenesis Imperfecta nga nagpuyo sa Isla sa Caohagan ang nakalampos gyud sa ilang pagtuon bisan pa man sa ilang kahimtang.

Si Jean Laurence Balingit, 17,  mitapos sa Junior High School, samtang ang iyang manghod nga si Aliyah, 12, mitapos usab sa elementarya. Silang duha susama ra ka dako sa masuso nga isakay sa stroller hatod kuha sa ilang eskwelahan.

Maglisod sila sa paglihok tungod sa ilang kahimtang, gani maghayang nga magsulat sa eskwelahan.

Ang dako nga kalisdanan ilabi na sa maguwang kay molabang pa siya sa pikas isla aron makaeskuyla sanglit wala may high school sa Caohagan busa moadto siya sa Pangan-an Island.

Gisungasong niya ang mga dagkong bawod sa kadagatan makab-ot lang ang pangandoy apan mas sakit ug lisod kuno ang pagbiaybiay nga ilang madawat gikan sa ubang tawo.

Apan nabuntog kini nila ug gigamit nga inspirasyon aron ipakita nga dili sila matarog sa mga pagsulay nga babag sa ilang damgo.

Si Jean pursigido nga mopadayon pagtungha hangtod mamahimong abogada, samtang ang iyang manghud nga si Aliyah magmaestra.

Kong nalatas nila ang taas nga katuigan sa lower education wala’y rason nga dili nila makab-ot ang mas taas pa nga edukasyon.

Ang determinasyon sa Balingit sisters angayan nga panaminan sa tanan ilabi na sa mga tinun-ang wala’y problema sa panglawas ug sa pinansyal.

Ang ginikanan nila kabus man apan gihimo ang tanan aron masuportahan ang pangandoy sa mga anak.

Congratulations Balingit family, ang sugilanon sa pagpaningkamot naghatag og inspirasyon sa pagkab-ot sa kalamposan.