Istorya ng Pag-asa
Wa ko magdahom nga ang istorya sa akong kinabuhi nga namaligya og bayabas aron lang may magamit sa pag-eskwela ug ang ‘one day-one eat’ ug usahay ‘one day-no eat’ nga kahimtang sa kinabuhi, makapadani ug makahatag ba diay og pagtagad sa mga naglangkob sa pasidungog nga gitawag og Istorya ng Pag-asa
Ang istorya sa akong kinabuhi, usa sa 17 ka istorya sa kinabuhi nga giapil sa proyekto nga naghatag og pasidungog niadtong mga tawo kansang istorya sa kinabuhi makapadasig ug mahimong ehemplo sa uban. Ang proyekto gitawag kini og Istorya ng Pag-asa nga gipasiugdahan sa opisina ni Bise Presidente Leni Robredo, JCI Zugbuana ug Cebu City Government.
Kaniadtong adlaw nga Martes, Marso 27, sa ala una sa hapon didto sa Robinsons Galleria gipakita sa publiko ang mga tawo kansang istorya sa kinabuhi napilian. Ang maong kalihokan gitambongan mismo ni Bise Presidente Leni Robredo, Mayor Tomas Osmeña ug mga opisyal ug sakop sa JCI nga gipangulohan ni Hershe Legaspina, JCI Philippines Regional Vice President, Kalipi Womens Group ug mga GAD focal sa nagkalainlain nga barangay sa dakbayan sa Sugbo.
Sa proyekto nga Istorya ng Pag-asa, imong mahibaw-an ang nagkalainlaing istorya sa kinabuhi sa mga tawo dili lang sa istorya niadtong nagsugod sa wala, ug hangtud na sa ilang pagka adunahan, kon dili, apil na niini ang istorya sa mga ordinaryong tawo nga nagmalampuson sa ilang pagpakigbisog sa pagpakigbatok sa madaugdaugon nga katilingban.
Apil pud sa Istorya ng Pag-asa ang natampo sa tawo alang sa kaayohan sa katilingban ug uban pa. Ang proyekto nga Istorya ng Pag-asa maayo ug gipalambo niini ang positibo nga bili sa kinabuhi. Nagdasig usab kini sa uban sa paghimo nga ehemplo ug sa pagsunod sa kinabuhi sa mga tawo nga adunay positibong panglantaw sa ilang kinabuhi, o sa paghimo og ilang kaugalingong istorya. Unta magpadayon kini.
- Latest