Ang ihap

Nagpadayon ang patay sa Metro Cebu, ug tungod niini nagpadayon usab ang ihap sa gidaghanon sa mga gipangpatay. Kon maghisgot ta og Metro Cebu, naglangkob kini gikan sa Carcar paingon sa Danao, ug apil na niini ang isla sa Mactan ug lungsod sa Cordova.

Niadtong Sabado sa tungang gabii, sagunson ang pinatyanay sa dakbayan sa Sugbo ug dakbayan sa Mandaue. Sa dakbayan sa Sugbo dili hinuon ang target sa pagpatay maoy namatay. Nadamay lang kini diha nga ang target sa pagpatay nga si Wellington Lim nakalingkawas sa 55 ka bala sa armalite nga gipauwan sa iyang sakyanan.

Dako gyud ang pagpasalamat ni Wellington Lim sa iyang kublan nga sakyanan. Sa pagsuway sa pagpatay sa magpapatigayon nga Wellington, maoy namatay ang security guard nga nagbantay sa parking area sa bar ni Lim. May naangol usab nga laing tulo. Samtang sa dakbayan sa Mandaue, sa susama gihapon nga oras, gipatay sa motorcycle riding-in-tandem ang laing drug personality.

Sukad niadtong Pebrero 17, hangtud kaniadtong Marso 25, miabot na sa 48 ka tawo ang gipangpatay ug lima ang nakalingkawas sa krimen nga gihimo sa mga nagsakay og motorsiklo. Niining tanan, usa ra gyud ka kaso ang nahatagan og kasulbaran sa kapolisan, kadtong pagpatay ni Niño Tanajura sa C. Padilla sa miaging Sabado.

Apan bisan pa man niini, giawhag ni Police Regional Director Robert Quenery ang publiko sa dili pagkaalarma tungod kay nalahi ang maong mga kaso sa krimen ug gani iya pa nga gipakita sa publiko ang pag-ubos sa kaso sa krimen sa buwan sa Enero hangtud Marso niining tuiga nga miabot lang og 135, kon itandi sa 170 sa susamang mga buwan sa tuig 2017.

Itugot nato nga dili makapaalarma ang mga pagpamatay nga nahitabo tungod kay managlahi ang mga kaso sa krimen, pero maalarma ra gihapon kita kay sa maong mga krimen, kadaghanan niini wala gyud masulbad.