Salisi gang sa airport

Bisan asa ug bisan kanus-a, hala bira!. Kini mao ang mga kawatan nga mangita lang og binta aron makapamiktima.

Sama sa nahitabo sulod sa Mactan Cebu International Airport diin usa ka babayeng pasahero nabiktima sa mga sakop sa salisi gang, o grupo sa mga kawatan nga mopahimulos sa higayon kon malipat ang tawo nga gusto nilang biktimahon.

Mopauli na unta sa kaulohan ang biktima gikan sa iyang pagbisita sa Sugbo. Gibutang lang kadiyot sa babaye ang iyang bag nga hilabihang mahala ang kantidad, nga may sulod usab nga dakong kantidad ug mga alahas nga moabot sa tunga sa milyon ka pesos.

Kalit lang nahanaw ang bag nga gikawat sa wala hiilhing mga kawatan diha sa airport.

Nakita sa CCTV footage ang grupo sa mga babaye nga maoy mihimo sa modus, diin ang usa maoy nipunit samtang ang mga kauban nagsilbe nga tigkuha sa pagtagad sa biktima aron dili masakpan ang ilang kauban.   

Apan gawas sa pagkawagtang sa butang sa biktima, mas nasakitan siya sa kakuwang kuno og pagtagad sa tagdumala sa airport dihang iya kining gipaabot kanila ang problema.

Tinguha unta niya nga tan-awon dayon nila sa CCTV footage aron masakpan ang mga kawatan. Apan wala kuno mosugot ang taga airport hinungdan sa hilabihan kasakit ug kadismaya nga iyang gibati.

Nakauli na sa kaulohan ang biktima dihang nakakuha og kopya ang mga otoridad sa CCTV footage nga ulahi na kaayo, kay wala naman diha ang mga kawatan.

Matud sa tagdumala sa airport, gitugyan nila sa mga imbestigador ang kaso ug giisip nila nga ‘isolated’ ra kini dungan sa paniguro nga luwas gihapon ang airport gikan sa mga tinonto.