Ayaw ihikaw ang katungod

Naaprobahan na sa komite sa Ubos Balay-balauranan ang bill nga nagsuspende sa piniliay sa barangay ug Sangguniang Kabataan.

Kon motando na gayud ang kinatibuk-ang Kongreso sa dili pa ang Mayo, hayan mapurnada na usab ang maong eleksiyon ug ma-postpone na usab kini.

Hagbay ra unta nga ipahigayon ang barangay ug SK elections. Apan makadaghan usab kini nga gisuspenso. Naka-schedule unta kini niadtong Oktubre sa niaging tuig.

Apan adunay balaod nga nag-uktaba na usab sa maong eleksiyon ug nagbalbin ngadto sa Mayo 14 niining tuiga.

Gusto man gud ni Presidente Rodrigo Duterte nga iwani usa ang piniliay sa barangay ug SK. Hagbay ra nga nagyawyaw ang presidente nga nahadlok siyang basin unya kon gamiton ang eleksiyon sa mga politiko nga nalambigit sa negosyo sa druga.

Apan mora’g hasol usab paminawon kining sige nga ka-postpone nga eleksiyon sa barangay. Hagbay ra nga milapas ang termino niining mga kasamtangang opisyales sa barangay ug angay lang nga ipahigayon na usab ang bugnong lugaynon sa labing ubos nga local government unit.

Adunay uban kanila nga nakagamot na sa ilang puwesto ug nga angay na nga ilisan tungod kay katapusang termino na sa ilang katungdanan.

Adunay uban usab nga angay na nga pulihan tungod lagi kay nagmika sila sa ilang pagserbisyo ngadto sa ilang konstituwente.

Wala man siguro’y angay nga ikahadlok si Presidente Duterte nga masagolan sa aso sa druga ang eleksiyon sa barangay.

Hinuon, angay’ng hingusgan sa otoridad ang ilang kampanya batok sa druga aron nga dili kini gamiton sa bugok nga mga politiko panahon sa eleksiyon.

Dili gayud makasulod ang druga sa politika sa barangay basta magmaigmat lang siguro ang otoridad batok niini.

Usa pa, sayon lang nga monitoron kadtong mga barangay opisyal nga nalambigit sa druga tungod kay anaa na man sila sa listahan sa otoridad.

Angay lang usab nga dili na ihikaw sa kagamhanan ang katungod sa katawhan pagpili sa umaabot nga mga líder sa barangay. Makadaghan na nga na-postpone ang piniliay gumikan lang sa kahadlok sa kagamhanan nga masagolan kini sa kahugaw sa druga, ug angay nga madayon na gayud kini.