Nganong paagion na sa SRP ang mga PUJ?

Nangayo na si Mayor Tomas Osmeña og emergency powers aron masulbad ang suliran sa trapiko sa dakbayan sa Sugbo. Tingali nabati na niya ang nagkadaghang mga pagsaway sa mga tawo matag adlaw tungod sa kawalay aksiyon sa Cebu City Hall sa pagtiyabaw sa mga tawo nga mangatanggong sa huot nga trapiko.

Aw, maayo na lang kay nagpakitang gilas ang mayor. Pananglit magbunga ang iyang mga lakang, ang mga tawo ra gihapon ang mabulahan. Pero kinahanglan ba gyud ang emergency powers aron iyang masulbad ang suliran sa trapiko sa dakbayan?

Ang emergency powers nga gipangayo ni Tomas gitumong aron paagion ang mga PUJ sa South Coastal Road sa South Road Properties (SRP). Maayong masayod si Tomas nga sa tibuok siyudad sa Sugbo, mga 2,000 lang ka PUJ ang nagdagan.

Bisan asa ka nga page sa Facebook, mosulti sila nga nagkadaghan karon ang pribadong mga sakyanan tungod sa kamaayo sa ekonomiya ug may mga barato na nga mga kotse nga mapalit. Busa nagkinahanglan na gyud nga palapdan ang atong mga karsada sa siyudad aron paglikay nga maghuot ang nagkadaghang mga sakyanan.

Nagkadaghan na usab karon ang mga delivery trucks nga mga 10-wheeler, 12-wheeler, mga container vans tungod sa kamaayo sa ekonomiya sa Metro Cebu. Gani, ang mga eksperto nagkanayon nga dul-an sa tunga sa bilyon ka pesos matag adlaw ang nausik sa atong ekonomiya ug produktibidad tungod sa grabeng problema sa trapiko ug ang siyudad sa Sugbo mao ang labing kritikal nga lugar sa Metro Cebu.

Kon maghuot ang mga karsada dinhi, apektado ang mga silingang mga siyudad ug kalungsoran. Nagtuo ko nga kanang PUJ nga nagbiyahe og Naga ug Minglanilla, ang tuyo sa mayor nga paagion diha sa South Coastal Road. Ang akong pangutana, dili ba maghuot usab hinuon ang South Coastal Road kon anha na usab magpabadlong ang mga badlongon na daan nga mga PUJ sa habagatan?

O tuyoon na usab ni Tomas ang pagpahuot sa trapiko sa SRP aron mangreklamo na usab ang mga tawo? Akong amigong bilyako nanawag gyud nako aron mangutana kon matayming ba ang pagpaagi ni Tomas sa PUJ diha sa SRP dungan sa pag-abli sa mall sa iyang suod nga higalang si Bebot.

Dili unta maghuot ang trapiko diha sa Natalio Bacalso Avenue kon wala pa ipugos kanang tunnel dihang lugara. Gi-reject man diay ning maong proyekto sa miaging administrasyon kay ang tunnel dili man makadugang sa kapasidad sa karsada nga madaganan sa mga sakyanan. Igo ra kining gilusno pa-ilawom. Hisgotan nato kini sa sunod natong Tikdol.