Solusyon sa trapik

Gusto ni Cebu City Mayor Tomas Osmeña nga paagian ang Cebu South Coastal Road sa mga public utility jeepneys nga gikan ug mag-adtoan sa southern Cebu. Kini aron kuno pagluag sa Mambaling areas diin kamulo karon ang konstruksiyon sa underpass.

Apan dili pa kini mahimo gumikan lagi sa ordinansa nga nagdili sa mga public utility vehicles pag-agi sa CSCR. Apan aduna siya’y remedy. Gusto niya nga modeklara ang konseho og state of calamity sa kagrabe sa problema sa atrapiko aron dunay rason ang siyudad nga makagamit sa CSCR alang sa mga PUJs.

Hinuon, maayo man usab nga paagi ang paggamit sa CSCR alang sa mga PUJ aron lagi pagluag sa kahuot sa Mambaling area. Mao na lang kana nga aksiyon ang nakita sa kagamhanan sa dakbayan nga dinaliang solusyon sa maong problema.

Apan adunay mga concern nga angay usab nga hiloton sa lokal nga kagamhanan kon ugaling mopadayon kini sa mao nga plano. Kini alang usab sa kumbinyente ug siguridad sa mga pasahero ug mga drayber sa ila unya nga paglatas sa CSCR.

Una na niini mao ang pagkawalay loading ug unloading area sa entiro nga CSCR. Kini tungod kay gitukod ang maong karsada nga dili paagian og public utility vehicles. Ug problema gyud tuod ang pagkanaug ug sakay sa mga pasahero kon walay lugar nga igahin ang kagamhanan.

Problema usab ang kakulang sa suga sa CSCR. Delikado kini sa disgrasya panahon sa kagabhion, ilabi na nga daghan sa mga PUJs wala’y klaro nga suga. Angay lang nga hatagan kini og unang pagtagad sa otoridad sa dakbayan sa Sugbo ug Talisay.

Angay usab nga kanunay nga mag-monitor ang otoridad aron pagmintenar sa disiplina sa karsada. Nahibalo na kita nga daghang PUJ drivers ang mga kaskasero ug pataka lang og overtake bisan wala sa lugar aron makauna pag-pick up og pasahero.

Daghan na nga nahitabong aksidente kabahin sa mga PUJ nga nagbagiyos sa karsada kay naglumba lagi aron mabalik dayon sa ilang rota, ug delikado gayud kini sa disgrasya diha sa CSCR, ilabi na nga lapad ang mga karsada niini.