Pari gituboa’g sungay samtang nagwali

Kada pari may iya-iyang paagi pagsangyaw sa mga pulong sa Diyos ngadto sa katawhan. May pari nga ang wali pinabugnaw, may kusog mopasiaw. Duna’y makapaduka ug naa sa’y kusog mangasaba. Pero silang tanan pareho ra’g tumong – ang pag-agak sa mga nahisalaag nga karnero balik-subay sa matarong dalan sa kinabuhi.

Gumikan sa lainlaing kinaiya sa pari, ang mga parokyano, sa dili pa mosimba, magpangutana sa opisina kon unsa’y skedyul sa matag pari nga momisa. Ug maoy ilang pilion ang pari nga sa ilang tan-aw ligdong, buotan, masinaboton ug may hiyas sa pagkamapaubsanon.

Dili sila gusto’g pari nga estrikto, labi na’g may pagka superiority complex, diin kon unsa’y gustong balaod nga ipasunod, kinahanglang mao gyud ang matuman, ay...pastilan, ila ning gilikayan, uy!

Diha man gu’y guwapa, seksi kaayong misimba. Cleavage nakita. Sinina puwerteng muboa. Sidsid igo lang milapas sa bugan. Inig tuwad makita na ang langit. Nag asu-aso intawon ang mga mata sa pari samtang nagtan-aw.

Hapit lagi matagak. Haskang sukoa! Nahunong gud ang iyang homilya. Gihataga’g shoal ang seksi ug gipatapis kini aron matakpan ang daw nagpadaylang nga tentasyon. Okay ra unta kon kutob ra didto ang gibuhat sa estriktong pari.

Hala uy, iya man hinuong gikasab-an ang babaye atubangan sa daghang nanimba. Didto hinuon siya nabati! Nakalimot si Father nga isip alagad sa Diyos, dapat iyaha untang gisunod ang mga tunob ni Kristo Hesus.

Dihang gilansang si Hesus sa krus, gilud-an ug gibugalbugalan sa mga Hudiyo, unsay Iyang gihimo? Iya ba silang gikasab-an? Wala! Luyo sa kadaotan sa mga Hudiyo, gusto pa Niya silang luwason.

Gani, bisa’g natingala na Siya sa kamatayon, Iya pa nga gihangyo ang Diyos nga Amahan: “Amahan ko, pasayloa sila kay wala masayod sa ilang gibuhat.” Pagkanindot sa matang sa kinaiya nga Iyang gisangyaw sa kalibutan – ang mithi sa pagpaubos.

Saludo ko sa paring estrikto. Basta, ibutang lang niya sa hustong lugar. Pwede ra man unta niyang sekretohon pagbadlong ang babaye. Nungkang ibandilyo! Kay abi ninyo, no, mga suki ko nga readers, diha baya’y higayon nga ang nagmisang pari, samtang nagwali, nakita ko nga gituboa’g duha ka sungay iyang ulo. Ngano kaha to, no?