Makaayo o dili?

Nabahin ang reaksyon sa mga tawo kabahin sa pagdili sa Mandaue City government sa mga driver sa motorsiklo nga mogamit og bonnet, o tabon sa nawong kon moagi sa mga karsada sa naasoy nga dakbayan.

Tumong sa ordinansa mao nga mapakgang ang posible nga mga krimen, o ba kaha dali nga mailhan ang mga kriminal kon mohimo sila og krimen.

Apan alang sa mga apektadong motorista, dili makatarunganon ang gihimo sa mga opisyal sa Mandaue City kay nahikawan kuno sila sa ilang katungod sa pagproteher sa ilang kaugalingon gikan sa kadelikado sa abog nga ilang mahanggab atol sa ilang pagbiyahe.

Gani gikatakda nga mag-rally ang grupo sa mga motoristang apektado sa naasoy’ng palisiya. Ang pangutana, may mahimo pa kaha sila nga naumol man kini sa konseho pinaagi sa usa ka ordinansa?

Kon atong tan-awon, balido baya usab ang argumento sa mga motorista. Gawas pa, sigurado gyud kaha nga mapugngan ang krimen kon dili na magsul-ob og helmet nga may dark glass, ug bonnet ang mga driver sa motorsiklo?

Sa habig sa kagamhanan sa Mandaue, mas bug-at ang rason nga mas importante ang kinabuhi sa tawo nga kinahanglan nga panalipdan. Kon ang pag-ban sa helmet nga may tabon sa nawong, ug bonnet, ang usa sa pamaagi, nan, suportahan nato kining maong lakang.

Tinuod bitaw nga ang mga kriminal, sama sa riding-in-tandem, magsakay man gyud og motor ug magtabon sa ilang panagway kay aron dili mailhan.

Sama sa nahitabo ni Atty. Jonnah John Ungab, kansang gunman nagtaptap sa nawong, maong naglisod gyud ang mga otoridad sa pag-ila kaniya.

Ngano nga ang uban lagi nga mga tawo, sama sa mga driver ug  pasahero sa pampublikong sakyanan, dili man magtabon sa nawong bisan og makahanggab og abog?  Kon kaayohan sa kinabag-an ang tumong niining mao nga palisiya, ato kining suportahan.