Taphaw nga alegasyon

Tungod lagi kay hapit na usab ang bugnong lugaynon, inanay na nga nagkainit ang takuri sa politika niining dakbayan sa Sugbo.

Gani, hagbay ra nga nagsugod ang politikanhong lantugi tali sa Bando Osmeña Pundok Kauswagan sa administrasyon ug sa Team Rama sa oposisyon.

Niining panahona, kugi na og hinapakay og lapok ang duha ka habig.

Usahay mosangpot sa personal nga atake ang ilang birada batok sa usa’g usa.

Daghan na hinuon nga yanong lungsoranon ang magkatawa tungod  kay mora na hinuon sila’g mga bata nga nagbinanghagay.

Usa sa akong tan-aw nga hinanggaw nga bira sa mga sakop sa oposisyon mao ang ilang pasangil nga high school graduate lang kuno si Osmeña. Siguro tuyo nila nga sa ilang alegasyon sa kakulang sa nakab-ot nga edukasyon ni Osmeña, dili kini angay nga mag-mayor sa dakbayan.

Ambot kon mokubit ba kaha ang mga Sugboanon niining maong alegasyon sa oposisyon ug nga mohakot unya kini og daghang boto pabor sa Team Rama.

Apan alang sa uban, mora’g taphaw kini nga akusasyon gumikan kay dili man kaayo importante ang educational attainment alang sa usa ka politiko.

Dinhi sa Pilipinas kon panahon na gani sa eleksiyon, wala gayud mauso kanang prinsipyo kon unsa ikaw ka ngilnig sa imong edukasyon.

Basta kon aduna kay dakong salapi nga sarang ikatubil sa imong politikanhong kampanya, dako ang imong tsansa nga modaog sa piniliay.

Dili ba nga dinhi sa Pilipinas daghang midaog nga mga politiko nga wala gayud magsalig sa ilang nakat-onan sa edukasyon? Usa sa ehemplo mao si Senador Manny Pacquiao.

Unsa’y ilang gisaligan? Siyempre ang binulto nga salapi nga ilang naandang itingal ngadto sa mga pobreng botante.

Hinuon, ang atong Konstitusyon wala gayud nagdeklara nga kadto lang mga gradohan maoy adunay katungod nga modagan alang sa bisan unsa nga posisyon sa gobiyerno.

Basta kon makamao ka gani mosulat ug mobasa, ug maayo ang estado sa imong panghunahuna, kuwalipikado ka na nga modagan sa bugnong lugaynon.

Mao gani nga nag-usik-usik lang sa panahon si kanhi mayor Michael Rama ug kaalyado niini sa oposisyon sa ilang akusasyon nga dili gradwado sa kolehiyo si Osmeña.

Ang nakab-ot sa edukasyon dili kana maoy basehan panahon sa piniliay, kondili, ang kadako sa resources sa usa ka kandidato.