Mga pulong ni PDUT

Tugoti nga akong ipatik dinhi ang pipila ka pulong nga giluwatan ni Presidente Rodrigo Duterte nga nakapahugyaw, nakalingaw ug nakapasuko sa mga nakapaminaw niini. Kining maong mga pulong makatabang usab kanimo sa pagsabot sa personalidad ug pagkatawo sa presidente.

“Magmahay nako ang Ginoo kon iya ko nga himuong presidente.” Kini ang pamahayag ni Duterte sa dihang wala pa mosantop sa iyang huna-huna ang pagpapili sa pagka presidente sa nasud, bisan pa man sa kadaghan sa mga tawo nga gusto siyang himuong presidente.

“Sulbaron nako ang suliran sa gidili nga drugas ug kurapsiyon sulod sa duha ka buwan kon mapili ko nga presidente.” Pamahayag kini ni Duterte atol sa gipahigayong lantugi sa mga kandidato sa pagka presidente.

“Hatagi ko og dugang unom ka buwan pagsulbad sa suliran sa gidili nga drugas.” Pamahayag kini ni Duterte, duha ka buwan human siya mapili nga presidente, dihang wala niya masulbad ang suliran sa gidili nga drugas bisan sa kadaghan sa mga nalambigit sa gidili nga drugas nga mipakita sa kuwerpo sa kapolisan human gilusad ang Oplan Tukhang o Tuktok-Hangyo ug Oplan Double Barrel.

“Akong tulion ang mga opisyal ug kawani sa gobiyerno nga manghilabot sa salapi, o bahandi sa nasud.” Bahad kini sa presidente ngadto sa mga opisyal ug kawani sa gobiyerno nga iyang masakpan nga mangawkaw sa bahandi sa nasud.

Matud pa ni Duterte nga sa mayor pa siya sa Davao, daghan siya og nahimo nga kasaypanan, apan wala gayud mahitabo nga nangawkaw siya sa bahandi sa gobiyerno.

“Ibaligya nako ang akong kalag sa demonyo.” Lain kini nga pamahayag ni Duterte agi og pasalig nga mahatagan og trabaho sa Pilipinas ang mga OFW nga gipapauli gikan sa Kuwait tungod sa mga pagpangabuso sa ilang mga amo.