Krisis sa NFA

Dako nga alarma kining pagnihit karon sa supply sa bugas sa National Food Authority. Gani, dinhi sa lalawigan sa Sugbo, ang rehiyonal nga buhatan sa NFA miangkon nga wala na kini misuplay sa gatusan niini ka accredited retailers tungod sa nagkaubos nga stock.

Rason sa maong ahensiya mao nga wala kini maka-import og bugas hinungdan sa nasinati nga shortage karon.

Hinuon, matud pa sa usa ka opisyal sa NFA-7, ang kasamtangan nga supply gireserba lang alang sa mga emergency ug kalamidad.

Apan kabahin sa commercial rice, abunda kini sa supply sa tibuok nasud, matud pa sa maong ahensiya.

Nagbaha ang maong klase sa bugas sa mga merkado karon. Sa ato pa, sa kinatibuk-an, wala gyuy shortage sa bugas sa nasud. Ang NFA lang ang adunay nihit nga supply.

Hinuon, dili kalikayan sa katawhan nga maalarma niining seryuso nga shortage sa supply sa NFA. Dili ikalimod nga, sukad pa sa pipila ka dekada, mayoridad sa Pilipino nagsalig lang sa bugas gikan sa NFA gumikan lagi sa kabarato niini.

Niining pagnihit sa suplay sa NFA, asa na man unya padulong kadtong mga pobre, kinsa nagsalig sa barato nga bugas?

Dakong kaltas gayud sa ilang bulsa kon mapugos sila pagpalit niadtong mga commercial rice nga grabe na kamahal karon.

Basin baya kon mapareho na usab ang nahitabo karon sa niaging mga tuig sa dihang taas ang linya sa mga tindahan sa NFA sa tibuok nasud tungod sa pagtibugsok sa suplay sa maong ahensiya.

Daghan ang nag-alburoto niadtong maong krisis.

Angay nga susihon usab sa otoridad basin kon adunay mga retailers nga mi-take advantage sa krisis karon diha sa NFA.

Usa sa hinungdan sa nagnihit nga suplay sa bugas sa mga tindahan mao nga adunay badlongon nga mga retailers nga motago sa ilang stock.

Kinahanglan nga mohimo og dinaliang aksiyon ang kagamhanan niining problema karon sa NFA, kay kon wala na’y suplay ang maong ahensiya ngadto sa mga tindahan, dili layo ang posibilidad nga daghan unya ang mag-people power ug mosulong ngadto sa mga warehouse niini.