Ugma ang cash aid

Sa akong nadunggan, ugma na ang pagpanghatag sa cash assistance gikan sa Cebu City Hall para kanatong mga senior citizen ning dakbayan. P2,000 kuno for the months of January and February. Hayahay, dili ba? Mao gihapon, sa barangay ang pagpanghatag.

Atong kutloon ang Rule IX, final provisions sa Implementing Rules & Regulations (IRR) sa RA 9994, (Expanded Senior Citizens Act of 2010) bahin sa appropriation pagpatuman ning maong balaod:

“The appropriation necessary to implement the provisions of the Act and its Rules shall be included in the respective budgets of the responsible national government agencies subject to availability of funds. The heads of departments and agencies as well as local chief executives concerned shall immediately include in their annual appropriations the funding necessary to implement these programs and services.”

Atong masabot nga ang gasto pagpatuman sa mga provision sa RA 9994 ilakip sa mga budget sa mga buhatang nasyonal ug local. Sa ato pa, inig preparar nila sa ilang tinuig nga budget, ilakip gyud unta nila ang gahin alang sa mga senior citizen. Kini, aron pagseguro nga dunay “availability of funds,” kay na-included na man sa budget preparation ug proposal.

In the case sa local government units, akong tan-aw, kining financial assistance nga gihatag sa dakbayan sa Sugbo nganhi kanatong mga senior citizen, nga tag P12 mil ang tuig, dako na gyud kaayo. Meaning, labaw pa’s OK kining cash assistance nga atong madawat gikan sa dakbayan sa Sugbo.

Wala kini sa ubang mga local government units, sama sa adunahan nga mga dakbayan sa Quezon ug Makati.

Dinhi sa atong lalawigan, sa mga dakbayan, akong nahibaw-an, nga ang labing dako nga assistance P3,000 lang matag tuig, ug lagmit sa kalungsoran, wala kita masayod kon aduna ba sila’y similar assistance nga gihatag ngadto sa ilang mga senior citizen.

Ug bahin sa Office of Senior Citizens Affairs (OSCA), atong pahinumdoman ang mga local executives nga ang balaod nagbuot nga i-establish kini sa tanang dakbayan ug munisipyo sa tibuok nasud. Ambot kon gituman ba kini sa tanang lungsod.

Gibutang usab dinhi nga ang gasto alang sa maintenance ug operation sa buhatan sa OSCA, sagubangon sa hingtungdang local government unit. Giingon usab nga “the OSCA Head shall be assisted by the City or Municipal Social Welfare and Development Officer.”

So, ang role sa Social Welfare Officer mao ang pag-assist sa mga gimbuhaton sa OSCA.