Walhon nga pangisip

Molusad og dakong protesta batok sa kagamhanan ang mga militanteng estudiyante karong Pebrero 23. Saad kini sa mga estudiyante batok sa ilang alegasyon nga giingong kahiwian nga nakumiter kuno sa administrasyong Duterte batok sa katawhan Pilipino.

Sama sa gihapon ang mga tinun-an sa mga campus sa University of the Philippines sa nasud maoy mangulo sa maong protesta sa mga batan-ong militante. Dili na kini ikatingala pa gumikan kay hagbay ra nga walhon og pangisip ang pipila ka mga estudiyante niining maong tunghaan.

Hinuon wala man siguro’y problema ang sigeng sing-al niining mga militanteng kabataan ug ubang mga grupo batok sa gobiyerno. Gigarantiya kana sa atong Batakang Balaod tungod lagi kay ania kita nagpasilong ilalum sa demokrasya nga porma sa pangagamhanan.

Sukad pa sa pagkahimugso sa atong independensiya, normal na nga talan-awon kining mga protesta batok sa kagamhanan. Kabahin kini sa proseso nga naghatag sa katawhang Pilipinhon og politikanhong partisipasyon ug katungod pagpadangat sa ilang mga yangungo ngadto sa gobiyerno.

Apan malab-anan usahay kining mga kawsa sa mga militante.

Sa ilang mga protesta, adunay mga higayon nga mahimo sila nga bayolente ug nga mosulod sa mga lugar nga gidili alang kanila. Gani, daghang higayon nga ilang hagiton ang otoridad alang sa dugoon nga dispersal.

Atong tan-awon kon unsa’y kalaki niining mga estudiyante sa ila unya nga protesta. Misaad sila og dako ug halapad nga lakang batok kuno sa mora’g diktador nga pagdumala ni Presidente Rodrigo Duterte kinsa ilang giingong kakunsabo kuno sa Estados Unidos.

Nahibalo na kita nga adunay mga militanteng estudiyante ang nainpluwensiya sa mga rebeldeng komunista. Gani daghan kanila ang mipasagad sa ilang kaugmaon, nagpabukid ug nitapon sa mga rebelde aron pagsagop sa armadong pagpakigbatok sa kagamhanan.

Hinuon, kon magdala lang og kaguliyang ang maong protesta sa mga estudiyante ug moapektar sa kahusay ug kalinaw, basin kon tinud-on ni Duterte ang iyang bahad nga iyang palagputon kadtong mga tinun-an sa UP nga puro lang protesta ang giatupag, imbes nga mo-concentrate sa ilang pagtuon.