Ayaw dali-a basin matutyo

Gipasaka na sa kapolisan ngadto sa buhatan sa piskaliya ang mga kaso batok sa giingon nga usa sa mga suspek sa pag-ambus ug pagpatay kang Kapitan Felicisimo “Imok” Rupinta sa Barangay Ermita niining dakbayan sa Sugbo sa niaging semana.

Mga kasong murder ug frustrated murder ang gipasaka kang Jimmy Largo, usa ka konbiktado kaniadto, didto sa Cebu Provincial Prosecutor’s Office kaniadtong Lunes. Kini tungod kuno sa pagpusil kang Rupinta ug sa asawa niini samtang padulong sila sa ilang pinuy-anan sa lungsod sa Liloan.

Samtang gidala usab si Largo didto sa Cebu City Prosecutor’s Office alang sa pagpasaka sa mga kasong ilegal nga pagkupot og armas, eksplosibo ug druga nga nasakmit kuno sa kapolisan atol sa iya nga pagdakop didto sa Carbon Market ning siyudad kaniadtong Sabado sa kadlawon.

Hinuon hugtanon nga gihimakak ni Largo nga aduna siya’y kalabotan sa pagpatay ni Rupinta. Suod kuno sila sa maong kapitan ug nga wala’y rason nga iya kini nga mabuhat. Matud ni Largo didto siya sa Ermita kauban mismo sa igsuon ni Rupinta sa panahon sa pag-ambus sa biktima.

Kon ang kapolisan maoy pangutan-on, wala’y duha-duha nga usa si Largo sa upat ka suspetsado nga mibanhig kang Rupinta. Klaro kuno ang mga ebidensiya nga ilang nakalap nga nagpunting gayud ni Largo isip usa sa mga mamumuno sa mao nga kapitan.

Alang sa kapolisan, usa sa nagpakusog sa kaso batok ni Largo mao ang pag-ila niini sa asawa ni Rupinta nga si Jocelyn isip usa gayud sa mga nagpatay sa iyang bana. Hinuon atua na ang mga kaso sa korte ug ato na lang atangan ang pagdagan sa legal nga proseso niini.

Kinahanglan nga ipakita gayud sa kapolisan nga lig-on ang ilang mga ebidensiya batok sa mao nga suspetsado. Nagtakdo ba kini sa sirkumstansiya sa pagpatay sa biktima? Kini bisan pa man kon positibo nga giila sa asawa ni Rupinta nga si Largo gayud ang usa sa nagluthang sa iyang bana.

Apan basin baya kon tungod lang sa pressure nga madali ang pagsulbad sa kamatayon sa maong kapitan, mao na nga gidalidali na hinuon ang pag-umol sa kapolisan sa maong kaso. Kon mao man ugaling kana, dilikado na hinuon nga matutyo kini inigdagan na niini sa korte.

Ang tanang mata sa mga Sugboanon nakatutok karon sa dagan sa mao nga kaso. Mao na nga angay ipresentar sa kapolisan ang tanang ebidensiya ug argumento aron pagpakusog niini ug nga makumbinser ang husgado.