Promosyon sa SRP angay nga ibuwelo

Hinaut unta nga madayon ang tanyag sa usa ka dako nga kompanya nga mag-establisar og mixed-use development diha sa South Road Properties sa dakbayan sa Sugbo. Kini aron usab maka-generate kini og dugang trabaho alang sa mga molupyo sa siyudad.

Sa niaging mga adlaw, gianunsiyo ni Mayor Tomas Osmeña nga plano sa JG Summit nga mo-develop sa kanhi Kawit Island nga kabahin na karon sa SRP. Una kini nga dakong proyekto diha sa SRP ilalum sa bag-o niya nga termino.

Plano sa JG Summit, nga gipanag-iya sa bilyonaryong si John Gokongwei, nga motukod og casino, hotel ug uban pa diha sa maong area.

Mao kini ang usa sa labing dako nga negosyo unya sa Sugboanong magpapatigayon dinhi sa Sugbo. Sa kantidad nga P18 bilyones, kon madayon gayud ang maong proyekto, daghan sa mga Sugboanon ug ilang pamilya ang makabenepisyo niining mao nga proyekto, nga gituohan nga mohakot og liboan ka trabaho.

Dili lamang kana dako usab kini og mabubo sa panudlanan sa siyudad pinaagi usab sa buhis nga maani sa lokal nga kagamhanan gikan unya sa mga establisemento nga mookupar kon ma-develop na ang mao nga lugar. Angay bitaw nga iarangkada na sa lokal nga kagamhanan sa siyudad ang pagdani og mga mamumuhonan alang sa SRP.

Panahon na nga pakusgan na ang promosyon niini aron nga mobuwelo na ang development niini. Apan kinahanglan usab nga mosanong ang mga taga oposisyon diha sa konseho sa plano sa executive department alang sa SRP. Angay nila nga ihikling una ang bangi sa pulitika alang lamang sa kalamboan sa dakbayan.

Hagbay ra unta nga milambo ang SRP kon wala pa magsungag kining mga maayong laki diha sa City Hall.

Kini ang hinungdan ngano nga daghan sa mga mamumuhonan ang moyam-id sa siyudad gumikan niining rido sa pulitika.