Kasikbit milapas sa utlanan sa iyang property

Dear Atty. Divine,

Duna ko’y property sa probinsya apan dili titulado ug Tax Declaration lang ang akong gikuptan. Karong bag-o gipahibawo ko sa tenant sa akong yuta nga ang kasikbit nagsugod na sa pag-develop sa iyang yuta ug portion sa akong property giapil niya sa pagpahawan sa mga sagbot.

Nabalaka ko nga kun mosugod na ang kasikbit sa pagtikad sa iyang yuta magpadayon siya sa paglapas ngari sa akong property. Unsa’y angayan nako nga buhaton aron kapugngan kini? Daghang salamat. – Sarah

* * *

Dear Sarah,

Ang una nimong buhaton mao ang pagpasaka og reklamo batok sa kasikbit sa imong yuta ngadto sa barangay diin mahimutang ang inyong property.

Kini aron ipatawag sa barangay ang tag-iya sa kasikbit nimong yuta ug aron kamo magkaatubang ug magkahusay.

Mas maayo nga atol sa inyong panaghusay sa barangay, imong dad-on ang kopya sa subdivision plan sa imong yuta nga aprobado sa Bureau of Lands aron makita sa kasikbit nga nakalapas siya sa boundary.

Apan kun dili gyud mo mahusay sa barangay ug mopadayon gyud ang kasikbit sa pag-develop sa portion sa imong property, then ang last nimo nga option mao ang pagdangop na ngadto sa korte aron imong makuha pagbalik ang portion sa imong yuta nga iyang gilapas. Thanks and God Bless!- Atty. Divine

* * *

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.