Digong, dili si Macoy, ang ilang gipunterya

Duha ka butang ang angay bantayan sa mga tawo nianang mga anti-Marcos protesters nga nagsaba-saba karon sa kadalanan kay lagi nganong gipalubong sa Korte Suprema si Ferdinand Marcos sa Libingan ng mga Bayani nga dili man siya “bayani.”

Una, dili batok ni Marcos ang ilang punterya, kun dili, ang pagpalagpot kang Presidente Rodrigo Duterte. Ikaduha, ang pagpugong nga mogilak og balik ang mga Marcos pinaagi sa pagbalik sa usa nila – tingali si Bongbong – sa Malacañang.

Sulod ning semanaha, grabe ang saba-saba sa mga anti-Marcos protesters nga kasagaran mga tigulang na. Adunay mga batan-on, apan diyutay lang. Sa ato pa, wala na magtagad ang mga batan-on sa nasinati sa mga tawo panahon sa martial law. Mao nga ang ilang mga rally sa Colon, mas daghan pa ang mga batang libudsuroy nga naglaruylaroy sa downtown area, kay sa mga nanag-rally pagsinggit nga “kawatan si Marcos ug dili bayani.”

Tinuod ang kahadlok sa uban nga dili ang mga Marcos ang punterya sa mga protesters. Mosugot mo’g sa dili, daghan nianang mga anti-Marcos nga Aquino fanatics, kanang gitawag nila og Yellowtards, nga naguol nga nawala sila sa gahum kay ang taga-Davao nga si Digong ang na-presidente.

Adunay mga kunohay supporter ni Digong nga supporter usab ni Bise Presidente Leni Robredo nga nag-apil-apil karon sa anti-Marcos protests. Busa, kun makonberter isip anti-Duterte mass action ang mga rally, si Leni Robredo ang mabulahan kun mapalagpot nila si Digong.

Ang ikaduha nilang gikahadlokan mao nga kun adunay Marcos nga makabalik sa Malacañang, “goodbye bonot” man ang mga anti-Marcos nga anaa sa posisyon karon.

Gigamit sa mga anti-Marcos ang lalis sa “historical revisionism” nga matud pa tinguha pag-usab sa kasaysayan sa Pilipinas aron papason ang mga kasal-anan sa mga Marcos nga nasulat sa mga panid sa atong history books. Imposible kini.

Apan tay’m pa. Kining historical revisionism dili angay ikahadlok kun ang tumong niini mao ang pagkoreher sa mga sayop sa kasaysayan. Dili kini ikahadlok sa mga Aquino ug sa mga alyado niini kun ang mga “facts” mahitungod o batok nila dili tinuod, ug kun kanang mga nahisulat kalabot ni Marcos mao gyuy kamatuoran. Tungod kini kay ang historical revisionism usa ka proseso pagtukma sa sayop.

Kun nakabantay kamo sa lalis sa duha ka tawo. Hain kadtong daghan og sayop maoy saba kaayo.

* * *

Hain naman si Senate President Koko Pimentel?

Nganong wala man siya’y lakang nga gihimo batok kang Senador Leila de Lima?

Klaro na kaayo ang mga salaod ni de Lima – kalambigitan sa drugas sa Bilibid, pagkabit sa mga drayber ug bodyguard . Apan nganong dili man mo-aksiyon si Koko niini?

Kay lagi si de Lima ang iyang abogada sa iyang electoral case batok sa kauban niyang senador? Utang kabubut-on ni Koko diay kining paglaban niya kang de Lima.