Kagawasan

Karon atong gisaulog ang Independence Day. Nagkadaiya ang atong mga pakulo karong adlawa kay lagi ato man kunong gihandum ang atong kagawasan. Ang pangutana mao: Nahimo ba gyud tang gawasnon? Ambot lang kaha. Sa laing bahin sa Ebanghelyo karong Domingoha atong nakita ang babaye nga nakasinati og kapasayloan sa iyang mga sala. Ang atong Ginoo mismo maoy nipasaylo kaniya. Ning paagiha naangkon niya ang kagawasan usab. Nahimo siyang gawasnon sa kaulipnan sa sala. Nahimo siyang gawasnon gumikan kay iya man kining gipangita ug nirisgo siya sa iyang kaugalingong imahen taliwala sa mga “makatarunganon” aron lamang makaduol kang Jesus. Ang kagawasan di man tuod absolute apan ang bugtong paagi sa pagbansay niini mao man ang paghimo og maayo ug dili ang paghimo og dautan.