Ang polusyon sa ubang lugar (1)

Ang mga mosunod nga lugar nga atong hisgutan, nabaniog sa kalibutan nga grabeng nahugpaan sa hugaw o polusyon. Usa lamang kini ka pahigmata, nga kun dili kita magpakabana, sa pag-atiman sa atong kalikopan, nga kamenusan o kapugngan ang naglaundok karong kahugaw o polusyon sa atong nataran.

Malagmit nga moabot ang punto nga mas labaw pa kita sa kahugaw ni'ng mga lugara, sama sa mga mosunod;.

* Linfen, China — Usa ni ka siyudad nga gikonsiderar nga labing okupado sa polusyon sa tibuok kalibutan. Gumikan kini sa way kontrol nga pagbugwak sa mga hugaw o itom nga aso, gikan sa mga dagkong industriyal, buhatan o faktoriya, ug sa tambutso sa mga sakyanan. Ang hangin dinhi, grabe kadautan nga kun manghayhay ka'g puti, dili magdugay mahimo'ng itom na ang kolor.

* Ang 'Great Pacific Parch' — Mao ni ang isla sa basura nga naglutaw diha sa lawod sa Pacifico, nga nahimo'ng labayanan o tam-okanan sa mga makadaut o mga biya nga nakapasamot sa polusyon aning dapita. May gidak-on kini nga ang gilapdon, susama sa estado sa Texas. Kun tugkaron ang gilawmon ini'ng islaha nga pulos basura, sagad mga plastic, gibanabana moabot ngadto sa 30ft.

* Rondonia, Brazil — Mao kini ang labing hawan o naopaw nga parte sa kinadak-ang lasang o 'Amazon Rainforest' sa kalibutan. Kanhi usa ka 'green area' apan karon gipulihan sa mga dagko'ng rancho sa mga baka. Nga ang polusyon, inanay nga nagkalapad nga nakaapektar sa lasang o sa kasikbit nga lugar.

* Yamuna River — Napuwerhisyo ang gobyerno nila, nga bisag kini permi giatiman sa paglimpyo, apan tungod sa kawalay disiplina, padayon nga gipanglabayan sa mga hugaw o basura. Ang siyudad sa New Delhi, dako na'g gasto ini'ng sapaa apan nakawang lang kay nabaniog man ni's grabeng polusyon