Ang pinahitan sa lamok (1)
Daghan na ang napuwerhisyo ani’ng mga pinahitan sa lamok. Pagamay-gamay lang ni nga lamok, apan lupig kita sa kaigmat ug kaalisto nila. Lingawon ka’s paglupadlupad aron ikaw pakatulgon. Unya kun mohigda kana, madungog na ang mga hadyong sa pagsakdap, nga sa paghinanok mo, magdamggo ka’ng gikuninitan na sa mga lamok. Mobalikwas ka sa sige’g pangawot nga di katulog.
Inigbangon sa buntag, wa ka kaalinggat sa kinawtan mo, naimpeksyon na kadtong mga pinahitan sa lamok. Usahay di ka makamatikod nga may hilanat ka’s ilawon sa ginhawaan mo. Ang uban ini, manglabhag ingon sa gi-‘allergy’ nga namula ang panit. Kun ugaling may pinahitan ta’s lamok, sulaye kini’ng dinalia’ng mga remedyo aron dili maimpeksyon, sama sa mga mosunod:
* Suka – kun bation ka’g kakatol, butangan dayon ang apektado’ng panit nga pinahitan sa lamok. Mas maayo gamiton ang ‘apple cider vinegar’.
* Aloe-vera – pahiran dayon sa lanot sa ‘aloe-vera’, direkta sa pinahitang nagkatol o sa samad sa apektado’ng panit.
* Uga’ng sabon – nusnusan lang sa bareta’ng sabon panglaba, kay temporaryo makaalibyo ni’s kakatol sa pinahitan sa lamok. Kun nahupay na, banlawi’g limpyong tubig nga sabonan og ‘bathsoap’, mas maayo ‘peppermint soap’ ang gamiton.
* Baking soda – sagoli’g tubig gamay nga kutawon nga molaput, dayon butangan ang kadto’ng pinahitan nga panit. Unya mabati mo musamot ang kakatol ug mosakit, apan di ni magdugay’ng mawala ra ni taudtaud.
* Toothpaste – bisan unsang klase ini, moalibyo ni dayon, labi na ang ‘flavor base’ ini, sama sa ‘peppermint’ o ‘neemtree’, ang mas maayo gamiton. Mahimo sab magdukdok ka’g mga dahon ini nga ang duga, ibutang sa pinahitan.
- Latest
