Plastic bottle classroom

Usa ni ka talagsao’ng kwarto sa eskuylahan, kay may materyales kini’ng gigamitan lang og mga botelyang plastic. Naa’y daghan ani nga gipangbasura lang nga nagtipun-og diha sa palibot. Makatabang ni pagmenus sa galaundok nga linabay, nga ingon sa habog nga bukid sa mga basura. Makapamenus sab ni sa polusyon sa kalikopan ug makunhoran ang problema sa pagbara sa imburnal.

Ang katukoran niini’ng matang sa kwarto, nga nahimutang sa San Pedro, Laguna, maoy labing una dinhi sa rehiyong Asia. Proyekto kini nga gilusad sa “My Shelter Foundation”, nga gihimoa’g disenyo sa kanhing actor, si Architect Lilac Diaz. Niingon siya nga imbis malubong sa yuta ang plastic nga botelya nga 700 ka tuig pang madugta, naka-ideya siyang mas maayo’ng  kapahimuslan kini pinaagi sa mga proyektong pagpatukod og bilding ug ubang straktura.

Karon daghan na sila’g natukod nga ‘plastic bottle classroom’, ‘library room’, ug mga tag-as nga edipisyo, sa pag-abag sa 3rd district board members sa Laguna. Nila pa, ang nasud daku pa’g kulang sa  ‘classroom’  nga gibanabana mga  7,000 pa. Kini ang maayong diskubre sa Pinoy, nga makatabang sab sa pagdaginot sa gasto nga daghan sab ang makapahimus niini nga kaserbisyohan.

Si Celso Alcantara, nga usa ka ekspertong mason (panday sa semento),  niya pa, sud sa 14 ka tuig niya ining trabahoa, naobserbahan nga mas paborable ning lig-on kay sa naanda’ng mga ‘hollow-blocks’ nga maoy gamiton. Makasukol ang semento nga may  ‘botelyang plastic’ nga dili basta matay-og sa kinaiyahan.

Nagpamatuod lang nga kita’ng mga Pinoy, bisan luyo sa kapit-os sa atong kahimtang, mahiligon gihapon sa pagdiskubre’g mga ginagmay nga butang nga naghatag og kahulugan, nga aduna kini dakung maihatag nga kapuslanan sa kinabuhi. Hiyas kini sa dugong Pinoy, nga nagbaton permi og bag-o’ng paglaum.