Laglag bala sakyan sa mga terorista

Nabutang karon sa peligro ang seguridad sa mga tugpahanan human mibuto ang isyu sa “laglag bala” diin mura’g gipanglansang sa krus ang mga kawani sa Office for Transportation Security kon OTS.

Kini human pasanginli nga naggikan sa pipila nila ka kauban ang mga bala nga gibutang sa bagahe sa mga pasahero. Ang mga OTS employee sa Mactan Cebu International Airport (MCIA) nagpahigayon og silent protest pinaagi sa pagbutang og pink armband isip pagpakita sa ilang kadismaya sa pagtratar kanila sa katawhan nga gihukman na silang tanan sa sala nga hangtod karon wala pa masuta ang kamatuoran ilabi na didto sa Ninoy Aquino International Airport.

Mas sakit alang sa mga kawani nga naangin ang ilang pamilya sa kaulaw, ilabi na sa ilang mga anak nga sentro sa mga sungog sa laglag bala.

Usa ka lider sa hugpong sa mga kawani sa OTS ang nabalaka nga gumikan sa kahadlok sa pipila nila ka kaubanan nga mapasanginlan sa modus sa laglag bala, mahimong palutson na lang niini ang mga butang  nga maghatag og dakong hulga sa siguridad sa tugpahanan, sama sa mga bala.

Kun mahitabo man gani kini, dako kaayo kini nga risgo sanglit sayon na man lang unya makalusot ang hinagiban batok sa katawhan, ilabi na kun sakyan sa mga terorista nga posible nga nag-innovate na usab sa ilang mga weapons of mass destruction.

Wala kita masayod nga ang butang nga sama lang sa bala kun tan-awon, usa na ba diay ka gamhanang bomba nga mobuto simbako sulod sa airport  o sa eroplano.

Sa nahitabo sa uban nga kanasuran nga giatake sa mga terorista, kinahanglang tan-awon sa atong mga otoridad ang tanang posibilidad kay basin baya og nakasakay na ang mga terorista sa isyu sa laglag bala nga wala lang mabantayi tungod sa kontrobersiya nga nasagolan na og politika.