Butane cannister kuyaw

Dili pa lang g’yud dugay, akong nahisgotan ang kadelikado sa paggamit sa "butane gas" isip alternatibo nga gamit nato sa LPG sa pagluto.

Niadtong Oktubre 12, dunay dako’ng sunog sa dakbayan sa Lapu-Lapu diin migawas sa pasiuna nga imbestigasyon nga butane gas ang hinungdan sa maong sunog.

Base sa imbestigasyon sa kabomberohan, ang maong butane canister gisudlan diay og liquified pertroleum gas kon LPG ug maoy rason nga peligro kaayo.

Angayan na g’yud nga maalarma ang publiko sa kadelikado sa paggamit niining butane gas, kay lagi dili kasaligan ang canister niini kay mao ra'g lata sa sardinas ang kanipis.

Maayo na lang gani kay wala’y nakalas sa maong sunog ug mitala lang og P250 mil ang kadaot sa kabtangan.

Kadtong padayon pa nga migamit og butane gas, kun mahimo hunonga na ninyo kini aron makalikay kamo sa sunog. Dili nato angayang ibutang sa peligro ang mga sakop sa atong panimalay sa padayong paggamit niini.

* * *

Sa pikas bahin, pormal na nga nanumpa sa katungdanan ang 40 ka bag-ong sakop sa Bureau of Fire Protection (BFP) Region 7 kagahapon Oktubre 16, 2015.

Sagunson na g’yud ang atong recruitment sa mga bag-ong bombero nga dako kaayo og ikatabang sa dugay na nga suliran sa matag fire station sa lukop Central Visayas.

Gani nag-process na pud karon ang BFP-7 sa dugang kapin usa ka gatus nga items sa recruitment alang sa FO1. Dunay 300 kapin ka aplikante ang moagi sa makuti nga proseso sa recruitment process.

* * *

Sa kataposan, wala lang damha nga 12 ka tuig na diay ko ug akong mga batchmates, ang Batch KAAKBAY of 2003 gahapon, Oktubre 16.

Pagkadali ra g’yud sa pagdagan sa panahon. Sa akong batchmates dinhi sa Region-7, Happy 12th Anniversary Batch Kaakbay!