Ang “option” sa mga Ouano

Nagkadaghan karon ang suliran ni Gobernador Junjun Davide mahitungod sa mga sakop sa partido’ng Liberal sa lalawigan sa Sugbo.

Human sa una’ng distrito ug sa dakbayan sa Talisay nga nagkaguliyang tungod sa mga Gullas, Canoy, Villarante ug Delos Reyes, misunod dayon ang dakbayan sa Lapu-Lapu.

Ang suliran kun si kinsa nila ni Mayor Paz Radaza ug magpapatigayon Ephraim Pelaez Jr. ang himoong standard bearer sa pagka mayor.

Karon mitunga na usab ang suliran sa dakbayan sa Mandaue diin nag-ilog ang mga Ouano ug Quisumbing sa pagka mayor.

Si Governor Davide naghiko-hiko sa paghatag og hukom kun si kinsa nila ni konsehal Lolypop Quano-Dizon ug kongresista Luigi Quisumbing ang himoong standard bearer. Ang gusto ni Davide nga ma-solid ang Mandaue para sa partido apan mahimo ba kini kun wa magkasabot ang duha?

Sigun sa akong nadunggan sa mga taga Mandaue mas sikat si Lolypop kay ni Luigi. Sa ato pa mas daghan og dumadapig ni Lolypop kay ni Luigi.

Kamatuoran kini nga nahibaw-an na usab sa kampo ni Davide mao nga naglisod siya sa pagdesider kun si kinsa nila ni Lolypop ug Luigi ang himoong opisyal nga kandidato sa pagka mayor sa Mandaue.

Determinado na si Lolypop sa pagpapili pagka mayor sa dakbayan sa Mandaue ug mahimo man nga dili siya maoy kandidato sa Liberal.

Kun dili man gani siya ang himoong opisyal nga kandidato sa pagka mayor, daghan ang nag-apas kang Lolypop. Seguro nga maglayat-layat sa kalipay si Atty. Winston Garcia nga moatbang kang Davide.

Sa paglayat sa mga Ouano dili na makapaabot pa og suporta ang partido’ng Liberal gikan kanila ug dili na makuha ni Governor Davide ang daghang boto sa Mandaue.

Wala’y mawagtang ni Lolypop kun dili siya ang suportahan sa partido Liberal, hinuon ang partido ang makuhaan og boto sa iya unya nga pagbiya.