EDITORYAL – Drug lord lisud dakpon?

Nakaangkon na usab og dako-dako nga kalampusan ang kapolisan sa dakbayan sa Sugbo sa kampanya batok sa gidili'ng matang sa drugas apan ambot og makatuman ba sila sa gimando ni Mayor Michael Rama.

Mga duha ka milyon ka pesos ang kantidad sa shabu nga nasakmit sa mga sakop sa Cebu City Police intelligence division gikan sa giingong drug pusher nga si Arman Jaca nga taga Barangay Calamba.

Bisan tuod og nalipay ang mayor sa mao nga kalampusan apan dismayado gihapon kini kay wala pa man nila madakpi ang giila nga "Jaguar" nga giingong drug lord nga nag-operate sa Barangay Duljo-Fatima.

Kanunay'ng gibalik-balik pagpahibalo ni Mayor Rama ang iyang paghatag og kamandoan kang Senior Superintendent Marciano Batiancila nga dakpon g'yud si Jaguar.

Ang mga drug lord hinuon kuno dili mohikap og shabu mao nga lisud sila dakpon. Ang problema kay hangtud karon wala pa molihok si Batiancila bisan gani sa paghimo og kampanya batok sa ilegal nga suwertres nga mikatap na pag-ayo dinhi sa dakbayan.

Ang pagpakahilom sa kapolisan ug wala mohimo'g kampanya sa ilegal nga suwertres nakahatag na gayud og pagduda nga adunay mga polis nga nagproteher niini'ng mao nga ilegal nga kalihukan.

Kun kutob ra gani sa pulong si Mayor Rama ug wala siya'y buhaton nga lakang kun dili gayud motuman ang kapolisan sa iyang sugo, dili siya makapaabot og kalampusan sa iyang gitinguha.

Kinahanglan nga ang kapolisan pugson gayud sa mayor sa paghingusog sa ilang kampanya batok sa gidili nga drugas, ilabi na ang mga sakop sa Philippine Drugs Enforcement Agency (PDEA) nga nagsige lang og kyogpos sa ilang mga bukton.

Alang kang Senior Superintendent Batiancila angay nga pamatud-an niya ang iyang pagka lider sa kapin sa 1,000 ka polis dinhi sa dakbayan.