Kasubo misugat sa duha ka SAF

CEBU, Philippines – Dili tiaw ang gibati’ng kaguol sa mga pamilya sa 44 ka sakop sa Special Action Force (SAF) nga nakasinati sa linuog nga pagpatay sa mga sakop sa Moro Islamic Liberation Front (MILF) didto sa Mamasapano, Maguindanao.

Ang ilang katuyoan sa pag-adto sa maong dapit dili ang pagmugna og kagubot kondili aron madakpan ang nagtago-tago nga duha ka terorista nga maoy tigmugna og kagubot nga moresulta nga daghang kinabuhi ang makalas.

Ang maayo nila’ng katuyoan mao na man hinuon ang naghatud kanila sa kaalautan kay ang 44 ka sakop sa SAF mao na man hinuon ang napatay, apil na ang duha ka Sugbuanon.

Ang duha ka sakop sa SAF nga apil sa napatay mao sila si PO2 Windel Candano nga taga lungsod sa Dumanjug ug PO1 Romeo Cempron nga taga lungsod sa Consolacion.

Ang ilang patay’ng lawas miabot na sa Sugbo niadto’ng Sabado ug gidala na sa tagsa-tagsa nila ka dapit.

Nahimo’ng emosyonal ang ilang pamilya nga misugat sa patay’ng lawas nga gisulod na sa ilang tagsa-tagsa ka lungon ug bisan gani ang misugat nga kapolisan maklaro sa ilang panagway ang gihambin nga kasub-anan.

Gihatagan og gibug-aton sa mga lokal nga opisyal sa tagsa-tagsa nila ka lugar ang ilang kamatayon nga maoy hinungdan nga kauban sa mga kabanay ug kapolisan, apil sila sa misugat sa pag-abot sa patay’ng lawas.

Si Mayor Nelson Garcia ug mga kaubang opisyal sa Dumanjug ingon man si Consolacion Mayor Teresa Alegado apil sa mga opisyal nga misugat sa duha ka patay’ng lawas.

Baliktad kini sa nahitabo didto sa Villamor Air Base diha’ng nahidangat ang mga patay’ng lawas sa mga nakalas nga sakop sa SAF nga wala kahatagi og daklit nga panahon ni Pangulong Benigno Simeon Aquino III.

Atol sa maong higayon ang presidente mipalabi sa pagtambong sa kalihukan sa dakong kompaniya og mga sakyanan.