Mga tigsilbi ni Pope Francis

Upat ka adlaw human nila nahimamat si Pope Francis sa Palo, Leyte, wa pa mahibawo silang Cary Jaucian ug Estrella Maria "Teling" Serafica-Pangilinan nganong napili sila pagsilbi og pagkaon sa Santo Papa ug sa mga biktima sa katalagman sa Kabisay-an. Si Cary mao pay pagsugod sa iyang negosyo sa catering sa Tacloban samtang si Teling niisip nga kasarangan lang ang ilang gipanag-iya nga restaurant sa Ormoc.

Nagtuo hinuon nga ang ilang kalambigitan sa relihiyosong kahugpongan maoy nakaaghat sa kadagkoan sa Artsidyosesis sa Palo pagpili nila. Si Cary usa sa mga delegado sa Pilipinas alang sa Asian Youth Day nga gitambongan ni Pope Francis sa South Korea sa Agosto sa niaging tuig. Samtang si Teling aktibong sakop sa Brotherhood of Christian Businessmen and Professionals (BCBP).

* * *

Enero 1 pa gitawgan si Teling sa Artsidyosesis sa Palo nga mahimong apil siya sa mga mosilbi sa paniudto ni Pope Francis uban sa 30 ka biktima sa bagyong Yolanda sa silangang Kabisay-an ug sa linog sa Bohol. Apan gitugon siya sa di pagsaba tungod ug alang sa seguridad sa Santo Papa.

Duha ka semana niyang tago sa kasayuran kay di katug-an bisan sa labing suod niyang mga higala. Gawas pa, gipahimatngonan siya nga gisusi pa kinsa gyoy mapilian. Hangtod nga gipahibawo niadtong Enero 15, duha ka adlaw sa wa pa ang gitakdang pagduaw, nga usa siya sa unom nga napilian.

* * *

Laing posibleng hinungdan nga napilian siya, segun ni Teling, mao ang iyang pag-atiman sa retiradong obispo nga nagmasakiton. Kay napilian sang mosilbi sa Palo si Magdalena "Leni" de los Santos Larrazabal, nga iyang kauban pagmatuto sa obispo hangtod nga namatay.

Niangkon si Teling nga mora siyang nikaging sa pagsud ni Pope Francis sa kan-anan sa Archbishop's House sa Palo. Natandog siya pag-ayo dihang nilibot gyod ang Santo Papa sa lamesa ug gitagsa-tagsa paghangop ang mga biktima. Nahinangop sab siya dihang puerteng higop sa Santo Papa sa sabaw’ng manok nga kinamunggayan bisan di na kaayo init tungod sa kusog nga hangin sa bagyong Amang.

* * *

Hangtod karon di pang kasabot si Cary sa iyang gibati human nakahangop ni Pope Francis. Apan nanumpa siya nga di kawangon ang talagsaong gasa sa paghimong mas mapuslanon sa iyang kinabuhi. Pagbiya sa Santo Papa sa Palo, giapura sab silang Teling pagbiya sa Palo ug Tacloban kay peligrong silay matanggong sa bagyo. Maong nagdalidali sila og pauli sa Ormoc nga wa na makatilaw sa mga putahe nga ilang giandam alang ni Pope Francis. Nangagpas si Teling nga may maayo tingali siyang nahimo sa iyang kinabuhi maong gihatagan og kahigayonan nga makahawok sa singsing sa Santo Papa. Mas nadasig si Teling sa pagpadayon pag-alagad sa BCBP ug ubang relihiyosong kalihokan.