Pagrespeto sa sensilyo

Usa kini sa batakang sekreto, ngano ang uban sa atong naobserbahan nga bisan luyo sa kauyamot nga nag-ilaid sa grabeng kalisud, wa kita magdahum nga nakabangon sa kahamugaway. Unya makita pa nimo nga nagkadusingot sa panlimbasog pero malipayon man, mora'g way problema.

Kita hinuon nga daku nag suweldo, kanunay man walay kuwarta. Kulang pa gani gastohon sa mga panginahanglan. Kun buot gyud kwentahon igo kanang madato kay may permi ka nga dakong suweldo madawat. Dili man gud maoy basehan ang pag-asenso kun daku o wala ka may suweldo, kun dili sa disiplina unsaon paghatag bili sa imong kinitaan. Unsaon man? Respetohi ang sensilyo.

May higala kong magtiayon, nga katulo na tawon nabiktima sa sunog. Sige la’g sugod sa ilang kahimtang. Maayo la’g diskarte sa panguwarta. Ang asawa tinda-tinda la’g ginagmay ug ang bana sab mamanday kun may mokuha niya. Ako ni silang gikahinabi, ngano nga dali ra man sila makabangon. Makita man gud nimo anam-anam man modako ang tindahan, unya makatukod pag balay.

"Abe mo sir Pons, mahadlok man gud ko di kakita'g kuwarta kada adlaw. Basig magkalisod wa koy magamit sa panginahanglan nga di kabalibaran." Matud sa bana. "Gani sa di pa matulog sa gabii, magluhod mig magpasalamat sa Dios. Ighuman mag-inihapay kami sa limpyong kita namong duha. Tanang sensilyong 5 ug 10 pesos among iphon ug puston.

Ang ubang sensilyo, among hiposon sa dakung tadyaw, isip respeto nga ka sandigan sa kaugmaran namo."

Matud niya, nga atong respetohan ang mga sensilyo, puniton kun may makit-an ug kuhaon ang sensilyong sukli, unya hiposon og ihulog sa alkansiya.