EDITORYAL - Sex Tourism

Duha ka mga langyaw ang gidakop ug gipasakaan og kaso sa awtoridad tungod sa pasangil nga kalambigitan nila sa cyber-sex crimes ug child pornography.

Ang pagkasikop sa duha nagpakita lang nga bisan pa sa gihingusgang kampanya sa nagkadaiyang ahensya sa gobiyerno batok niini nagpadayon gihapon ang pagpangabuso ug eksploytasyon sa kabataang Filipino ingon man sa mga kababayen-an.

Bisan unsaon pa og limod sa gobiyerno ilabi na dinhi sa Sugbo, klaro kaayo nga matawag na kini nga ‘sex tourism.’

Ngil-ad man paminawon apan lisod man piyungon ang mga mata sa publiko ug magpakabuta-bungol nalang bisan duna g’yuy ingon na niini nga problema dinhi karon.

Kung buot kini nga sulbaron kinahanglang dawaton una sa mga naa sa katungdanan ang kamatuoran nga nag-exist na ni dinhi.

Dili lang law enforcement ang solusyon niini kondili, trabaho alang sa nagkinahanglan.

 Kuwang kaayo ang oportunidad aron makakita og tarong nga trabaho ug arang-arang ang sweldo alang sa ilang panginahanglan ang mga kabus.

Kini untang dapita maoy tutokan sa mga ahensya sa gobiyerno nga dili law enforcement ang mandato, kay samtang tinuod may mga nadakpan ug nasalbar nga mga biktima, dili niini masulbad ang problema.

Paon sa maong mga langyaw ang ilang kwarta nga maoy nihit sa pamilya sa mga biktima.

Busa mahinungdanon g’yud nga seryusohon sa nagkadaiyang ahensya sa gobiyerno ang mga livelihood programs niini samtang gihingusgan ang law enforcement batok cybercrime.